Miðnætursundstund í Lýsulaugum var haldin í annað sinn föstudaginn 9. júlí síðastliðinn. Lýsulaugar á Snæfellsnesi er eina laugin sinnar tegundar á landinu og í raun einstakar á heimsvísu. Í lauginni er heitt ölkelduvatn sem kemur beint upp úr jörðinni, inniheldur grænþörunga og er ríkt af magnesíum og kalsíum.

Það var Svæðisgarður Snæfellsness sem stóð fyrir Miðnætursundstundinni. Boðið var upp á kalt Ölkelduvatn undir áhrifum mohijo, blandað ýmsum hráefnum af svæðinu. Má þar nefna rabbabarasýróp frá sveitamarkaðinum Búsæld á Breiðabliki og kryddjurtum og ætum blómum frá Ræktunarstöðinni Lágafelli. Þá var graslaukur nýttur sem rör í anda umhverfis og heilsu. Gestir gátu einnig sett á sig heimagerðan andlitsmaska og gúrkur yfir augun. Viðburðinn sóttu hátt í hundrað manns og komu gestir af Snæfellsnesi og víðar.

Fyrirhugað er að halda „miðnætursundstund“ í öllum laugum Snæfellsness í sumar.

Fjölmenni á miðnætursundstund í Lýsulaugum