Fyrsti upplýsingafundur Almannavarna vegna Covid-19 frá 27. maí var haldinn í dag. Það voru þeir Víðir Reynisson og Þórólfur Guðnason sem töluðu á fundinum. Tíu greindust með Covid-19 innanlands í gær og af þeim voru fimm utan sóttkvíar. Það sem af er júlímánuði hafa 23 greinst innanlands. Af þeim voru tíu í sóttkví, sautján fullbólusettir, þrír hálfbólusettir og þrír voru óbólusettir. Flest smitin eru af völdum hins skæða Delta afbrigðis veirunnar.

Að sögn Þórólfs erum við nú að hefja nýjan kafla í baráttunni við veiruna. Þó telur hann ekki tilefni til hertra aðgerða innanlands en að aðgerðir á landamærunum séu til skoðunar. Hann tekur þó fram að þær megi ekki vera of íþyngjandi og segir eftirlit á landamærunum vera snúið því fjöldi ferðamanna er orðinn gríðarmikill og yfirvöld hafi ekki bolmagn til þess að skima alla ferðamenn.

Staðan áfram viðsjárverð

Þórólfur segir bóluefni gegn veirunni ekki eins öflug og hefðbundin bóluefni og komi ekki í veg fyrir smit eins og önnur bóluefni. Þau komi í veg fyrir alvarleg veikindi og sjúkrahússinnlagnir en að bólusettir einstaklingar geti smitast og jafnvel borið smit þó einkennalausir séu. Óvissan felist í því hvort bólusetning nái að vernda flesta, sérstaklega viðkvæma hópa.

Þórólfur metur stöðuna áfram góða en viðsjárverða og að baráttunni sé hvergi lokið. Tilmæli um að fólk ferðist ekki til áhættulanda séu enn í gildi og áhættulönd eru í dag öll lönd nema Grænland og jafnvel þar er faraldurinn í vexti.

Þórólfur benti á nauðsyn þess að taka til aðgerða snemma því alvarleg einkenni láta ekki á sér kræla fyrr en um tveimur til þremur vikum eftir smit. Ef beðið er of lengi þá séum við einfaldlega orðin eftir en það sé einmitt það sem átti sér stað í þriðju bylgju faraldursins.

Víðir lauk svo fundinum með því að hvetja til handþvotta og sprittnotkunar, hæfilegri fjarlægð sé haldið og hvatti fólks til að fara í sýnatöku finni það fyrir minnstu einkennum. Lokaorð Víðis voru: „Covid er ekki búið fyrr en því lýkur alls staðar.“

Aðgerðir ekki hertar