Laugardaginn 17. júlí heldur Jón Gnarr tónleika á Sögulofti Landnámssetursins í Borgarnesi. Þar mun hann syngja Völuspá við eigið lag. Með honum verða Hilmar Örn Hilmarsson, tónskáld og allsherjargoði og Hilmar Örn Agnarsson organisti, en þeir hafa verið Jóni til aðstoðar við verkefnið og leika þeir undir flutninginn á ýmis hljóðfæri. Meðal þeirra er steinharpa Páls á Húsafelli og merkilegur koparlúður svokallaður norskur lur eða Víkingalúður.

Sú útgáfa sem Jón flytur er hin svokallaða Konungsbókargerð. Hún er þekktasta útgáfan og talin elsta útgáfa ljóðsins og er alls 63 erindi. Flutningur tekur um klukkustund og ber viðburðurinn yfirskriftina Jón Gnarr og Þeyr 2. Jón fetar hér inn á alveg nýtt svið sem sýnir að honum er ýmislegt til lista lagt. Blaðamaður náði tali af Jóni Gnarr þar sem hann var staddur í Stykkishólmi og var að stíga um borð í bát. Bátsferðin er hluti af óvissuferð sem Jón hefur varið miklum tíma í að skipuleggja í tilefni af afmæli konu hans, Jóhönnu Jóhannsdóttur eða Jógu.

Tilbúinn í allt nema þjóðdansa

Aðspurður um hvernig þetta verkefni hafi komið til segir Jón að það sé lokaáfanginn í meistaranámi hans við Listaháskóla Íslands. „Ég ákvað sem lokaverkefni að flytja Völuspá við lag sem ég samdi sjálfur. Ég hafði samband við Hilmar Örn Agnarsson sem leist strax stórvel á þetta. Við höfðum síðan samband við Hilmar Örn Hilmarsson, allsherjargoða með meiru, og honum leist sömuleiðis stórvel á þetta,“ segir Jón. „Við höfum verið að hittast og æfa og við höfum komið einu sinni fram. Þá héldum við opna æfingu í Bókabúð Máls og Menningar sem gekk alveg stórvel,“ heldur Jón áfram. „Svo hef ég alltaf haft miklar mætur á Landnámssetrinu og langað að koma fram þar.“

Þegar Jón er spurður að því hvort verkið verði flutt aftur segir hann að það verði flutt aftur á formlegri útskrift sem haldin verður á Þjóðminjasafninu 26. ágúst næstkomandi. Frekari flutningur er óákveðinn enda; „..enginn flutningur öðrum líkur. Þetta er algerlega einstakt,“ segir Jón. Þeir félagar hafa fengið hljóðfæri lánuð, meðal annars flautur og steinhörpu frá Páli Guðmundssyni á Húsafelli auk þess sem þeir vonast til þess að norski Lur-inn nái í hús fyrir tónleikana.

Hvort þeir félagar græði mikið á þessu tiltæki segir Jón ólíklegt en segir þó: „Völuspá hefur nú haft mikil áhrif á alla mína tilveru. Völuspá er náttúrulega galdrakvæði og það að stinga sér í Völuspá er óvissuferð sem ég hef ekki hugmynd um hvernig endar.“ Og hann heldur áfram: „En ég er annars tilbúinn í allt nema það sem inniheldur þjóðdansa, þá get ég ekki hugsað mér.“

Völuspá hefur haft mikil áhrif á alla tilveru Jóns Gnarr