Síðastliðinn miðvikudag hætti Bifreiðaþjónusta Harðar starfsemi í Borgarnesi. Þar með lauk 57 ára samfelldum rekstri fyrirtækisins. Fyrirtækið hefur alla tíð sinnt smurþjónustu og hjólbarðaviðgerðum, nú síðast við Borgarbraut 55. Þegar leið að lokum síðasta starfsdags á verkstæðinu var boðið upp á köku, eins konar erfidrykkju starfseminnar, að sögn Davíðs Sigurðssonar annars af eigendum fyrirtækisins. Eins og fram kom í frétt Skessuhorns í síðustu viku var hætt við áform um að flytja starfsemina í annað húsnæði og hefur því verið skellt í lás. Blaðamaður Skessuhorns var á ferðinni og fangaði lágstemmda stemninguna síðastliðinn miðvikudag. Einnig lék honum forvitni að vita hvort önnur bifreiðaverkstæði í Borgarnesi gætu tekið við þeirri þjónustu sem nú hefur verið hætt á Borgarbraut 55.

Hálfdán Þórisson rekur lítið bifreiðaverkstæði, Bílabæ, við Brákarbraut 5 í Borgarnesi. Hann hefur einn starfsmann með sér en kveðst vilja hafa þá fleiri. „Ætli það séu ekki komin ein þrjú ár síðan ég reyndi að auglýsa eftir starfsmönnum, en með afskaplega takmörkuðum árangri. Það er einfaldlega skortur á bifvélavirkjum í landinu, allt of fáir sem læra þessa iðngrein og fáir sem leitast eftir að starfa úti á landi. Þá bætist það við að ef maður finnur starfsmann sem vill flytja hingað er afar lítið um laust íbúðarhúsnæði hér í Borgarnesi. Starfsmannaskortur gerir það því að verkum að ég hef ekki getað aukið við starfsemina hjá mér eins og æskilegt væri,“ segir Hálfdán. Auk þess að sinna almennum viðgerðum á bílum og hjólbarðaþjónustu rekur Hálfdán flutningabíl og sækir bilaða eða tjónaða bíla af vettvangi og kemur þeim til viðgerðar.

Fyrr í vor opnaði Guðjón Kristjánsson, ásamt Sigurði Heiðari syni sínum, nýtt verkstæði undir nafninu Gúndi GK. Það er í nýlegu iðnaðarhúsi við Sólbakka 19, iðnaðarhverfinu skammt ofan við Borgarnes. Þeir feðgar hafa nú keypt tækjabúnað til að geta sinnt hjólbarðaviðgerðum og smurþjónustu og ætla auk þess að taka að sér að skipta um bremsuklossa. „En við þurfum að bæta við mannskap. Þar erum við að glíma við sama vandamál og aðrir hér í bænum, það virðist vera erfitt að fá menn til vinnu. Við erum hér með þrjár bílalyftur, dekkjavélar og ágæta aðstöðu, en vantar meiri mannskap,“ segir Guðjón, en samhliða þessum rekstri við Sólbakka starfar hann sjálfur við rekstur Sláturhúss Vesturlands í Brákarey. Það er því í mörg horn að líta hjá honum.

Loks ber að geta að Steinþór Hans Grönfeldt, sem er einn þeirra sem starfað hefur hjá Bifreiðaþjónustu Harðar og missir nú vinnu sína. Hann hefur keypt dekkjavél og leigt sér aðstöðu í hluta Borgarplastshússins við Sólbakka. Hann hyggst m.a. bjóða upp á neyðarþjónustu fyrir bíleigendur sem lenda í því að sprengja dekk úti á vegum eða dæla röngu eldsneyti á bíla sína. Hans þjónusta mun felast í að sækja bíla og dekk og gera við.

Á sjötta hundrað vörunúmer af smur- og loftsíum var að finna á lager smurþjónustunnar á Bifreiðastöð Harðar. Hér er Lárus Jóhannsson að sækja síðustu loftsíuna, sem reyndist vera innarlega í efstu hillu. Lalli vissi þó upp á hár hvar hana var að finna.

Vantar starfsmenn á verkstæðin í Borgarnesi