Séra Geir Waage fyrrverandi sóknarprestur í Reykholti hélt ásamt sóknarnefnd kveðjumessu á sunnudaginn eftir ríflega fjögurra áratuga þjónustu. Við starfinu hefur tekið séra Hildur Björk Hörpudóttir. Húsfyllir var í Reykholtskirkju og hátíðleg stund í blíðskaparveðri. Eftir messu var boðið upp á safnaðarkaffi að gömlum og góðum sveitasið. Margir nýttu sér svo að fara í beinu framhaldi á tónleika Borgarfjarðardætra sem sungu í kirkjunni síðdegis. Séra Geir flutti við þessa kveðjustund kröftuga predikun þar sem hann minnti á frumkjarna kristinnar kirkju. Galt hann varhug við að láta vindköst tíðarandans bera sig af hinni réttu leið, eins og Bjarni Guðmundsson einn kirkjugesta og kórfélagi orðaði það svo skemmtilega að aflokinni athöfninni.

Reykholt í Borgarfirði árið 2016. Ljósm. Guðlaugur Óskarsson.

Séra Geir Waage og Dagný Emilsdóttir eiginkona hans hafa komið sér fyrir í nýju húsi sem þau byggðu við Hallveigartröð í Reykholti. Hyggjast njóta efri áranna á staðnum þar sem þau hafa lifað og stýrt málum í áratugi. „Hér höfum við nóg fyrir stafni. Búum í skógarjaðrinum og við grösugar flatirnar. Við munum halda áfram að hlúa að gróðri og umhverfi okkar eins og heilsan leyfir. Hyggjumst njóta þess að halda áfram að nudda í þessu við moldina og gróandann. Svo verður ekki langt að fara, þegar þar að kemur, þar sem yndisleg moldin bíður eftir manni þegar sá tími kemur,“ segir Geir í samtali við Skessuhorn.

Óhætt er að segja að Reykholtsstaður hafi í tíð séra Geirs sem staðarhaldara tekið umskiptum. Lögð hefur verið áhersla á að skapa skjól með skógi ofan við byggðina og almennt hefur umhirðu staðarins verið til sóma. Í tíð hans sem Reykholtsprests var ný Reykholtskirkja og Snorrastofa byggð, gamla kirkjan gerð upp og húsum gamla héraðsskólans fengið nýtt hlutverk.

Í símaskrá titlar séra Geir Waage sig nú sem pastor emeritus. „Gömlu mennirnir voru ýmist kallaðir pastor emeritus eða uppgjafarprestar, höfðu gefið upp prestinn eða embættið. Mér finnst skemmtilegt heiti að vera uppgjafarprestur en hyggst engu að síður notast við latneska heitið pastor emeritus.

Geir Waage kvaddi söfnuð sinn