Úrskurðarnefnd um upplýsingamál hefur með úrskurði sínum 7. júlí síðastliðinn komist að þeirri niðurstöðu að sveitarfélaginu Borgarbyggð hafi borið að veita íbúum aðgang að fjárhagslegum upplýsingum sem beðið var um en hafnað að veita í krafti trúnaðarupplýsinga. Það var Guðsteinn Einarsson íbúi í Borgarbyggð sem leitaði til nefndarinnar í framhaldi af því að hann hafði fengið synjun á ósk um upplýsingar sem fram komu í skýrslu sem KPMG vann fyrir sveitarstjórn og kynnt var á fundi byggðarráðs 7. janúar síðastliðinn. Í skýrslunni koma fram upplýsingar úr innra eftirliti og fjárhagskerfi sveitarsjóðs árið 2020 og fjallað var um á fundi byggðarráðs. Í svari sveitarfélagsins til Guðsteins, sem dagsett var 9. mars 2021, var vísað til þess að á fundi byggðarráðs sem fram fór 21. janúar 2021, hefði verið bókað að sveitarstjóri hefði lagt fram minnisblað um ástæður þess að fara bæri með skýrslu KPMG sem vinnuskjal og því trúnaðarmál.

Guðveig Lind Eyglóardóttir, fulltrúi minnihlutans í byggðarráði, lagði fram bókun í byggðarráði þess efnis að hún teldi óásættanlegt að ekki væri hægt að greina frá helstu veikleikum og ábendingum sem sveitarfélaginu hefðu borist og tillögur að úrbótum. Eðlilegast væri að byggðarráð myndi greina íbúum í meginatriðum frá hverjar athugasemdirnar væru. Meirihluti byggðarráðs ítrekaði að um vinnuskjal væri að ræða. Aflað hefði verið upplýsinga hjá KPMG um hvers vegna umrætt gagn innihéldi trúnaðarupplýsingar. Þau svör hefðu fengist að skjal af þessum toga gæti innihaldið upplýsingar um einstaka starfsmenn og annað sem félli undir persónuvernd. Alvarlegustu athugasemdum yrðu gerð skil í skýrslu endurskoðenda sem lögð yrði fram opinberlega með endurskoðuðum ársreikningi síðar á árinu. Í svari Borgarbyggðar til Guðsteins kom fram að litið væri á gagnið sem vinnuskjal í skilningi upplýsingalaga þar sem verið væri að vinna að undirbúningi lokaskýrslu með ársreikningi sem birt yrði opinberlega að lokinni samþykkt hans. Af þeim sökum væri beiðni Guðsteins hafnað.

Taldi óreiðu í umsýslu framkvæmda

Í kæru Guðsteins til úrskurðarnefndarinnar kemur fram að hann teldi talsverða óreiða hafa verið á framkvæmdum á vegum sveitarfélagsins sem lýstu sér m.a. í því að framkvæmdir hafi farið langt fram úr áætlunum. Ákvörðun um þær væru á ábyrgð stjórnenda sveitarfélagsins og því eðlilegt að upplýst væri hver bæri ábyrgð á þeim. Þá dró hann í efa að í skýrslunni væri að finna persónugreinanlegar upplýsingar. Því fór hann fram á að úrskurðarnefndin hlutaðist til um að hann fengi umrædda skýrslu afhenta.

Almennar athugasemdir og tillögur að lausnum

Niðurstaða úrskurðarnefndar um upplýsingamál er afgerandi. Varðandi trúnaðarþáttinn sem vísað var til kom fram að þegar umrædd skýrsla hafi verið afhent öðrum teldust upplýsingar í henni ekki lengur til vinnugagna nema þau hafi einvörðungu verið afhent eftirlitsaðila á grundvelli lagaskyldu. Loks segir í niðurstöðu úrskurðarnefndar að í skýrslu KPMG hafi verið að finna almennar athugasemdir og ábendingar um atriði sem fram hafa komið við endurskoðun á reikningsskilum sveitarfélagsins. „Þar er einnig að finna tillögur að lausnum og viðbrögðum við þeim. Í skýrslunni er ekki sérstaklega fjallað um aðkomu nafngreindra einstaklinga, starfsmanna eða stjórnenda. Að mati úrskurðarnefndarinnar eru upplýsingarnar sem þar koma fram því ekki þess eðlis að efni skýrslunnar teljist vera viðkvæmar upplýsingar sem lúta skuli trúnaði með vísan til þeirra hagsmuna sem framangreindum undanþáguákvæðum er ætlað að vernda. Þvert á móti hefur skýrslan að geyma upplýsingar um rekstur sveitarfélagsins og þar með ráðstöfun opinbers fjár og hagsmuna sem telja verður að almenningur hafi almennt ríka hagsmuni af því að kynna sér. Getur úrskurðarnefndin því ekki fallist á framangreinda afstöðu Borgarbyggðar um synjun á afhendingu skýrslunnar.“

Borgarbyggð bar að afhenda gögn sem snertu fjárhag