Keppni á vegum Mótorhjóla- og snjósleðaíþróttasambands Íslands til Íslandsmóts í mótorkrossi verður haldið á braut Motorcrossklúbbs Snæfellsbæjar sem staðsett er fyrir utan Enni við Ólafsvík laugardaginn 24. júlí. Keppnin hefst um kl. 10:30 og stendur til kl. 16:00. Skessuhorn heyrði hljóðið í Janusi Jónssyni, formanni klúbbsins. Janus býr reyndar í Reykjavík og starfar sem flugfjarskiptamaður hjá Isavia en notar hvert tækifæri til þess að fara vestur á heimaslóðir. Hann er sem stendur í barneignarleyfi og þegar við hringdum í hann var hann að leysa af sem ökumaður á trailer en Janus er með réttindi á svo til allt sem er á fjórum hjólum og hreyfist.

Starfsemi klúbbsins hafði verið í lægð í allmörg ár en á Ólafsvíkurvöku 2017 stóðu félagar úr klúbbnum, þeir Janus Jónsson, Albert Fannar Jónsson og Konráð Haraldsson, fyrir skemmtikeppni sem mjög góð mæting var á. Heppnaðist hún vel og fengu þeir í kjölfarið fyrirspurnir um hvort ekki ætti að endurvekja klúbbinn og halda keppni að nýju. Feðgarnir Svanur Tómasson og Stefán Svansson, hjá TS Vélaleigu, aðstoðuðu við að gera brautina tilbúna fyrir keppni en brautinni hafði ekki verið haldið við í mörg ár og ekki keppt á henni frá 2007.

Janus segir að starfsemi klúbbsins hafi eiginlega lagst niður upp úr 2007 en hann hafi komið að honum sem formaður í lok árs 2018. Sumarið 2019 hélt klúbburinn mót til Íslandsmóts. „Það gekk furðu vel miðað við að ég vissi nákvæmlega ekkert hvað ég var að fara út í,“ segir Janus. „Svo skemmir ekki fyrir að mamma, Bjarney Jörgensen, hefur hjálpað að sjá um fjármálin.“

Fjölgun í klúbbnum

Klúbburinn hélt nýlega námskeið fyrir nýliða í sportinu þar sem kennari af höfuðborgarsvæðinu kenndi og á næstu dögum munu þeir reyna að halda annað námskeið. „Við urðum varir við mjög mikla fjölgun iðkenda og vaxandi áhuga á mótorkrossi eftir að við fórum aftur af stað með klúbbinn. Við erum mikið spurðir út í sportið og eins hvort við vitum um hjól til sölu og þess háttar,“ segir Janus.

Auk feðganna Svans og Stefáns hjálpaði fyrirtækið Stafnafell einnig mikið við að gera brautina klára í ár. Þá segir Janus að ótal margir hafi komið að verkinu og þetta hefði aldrei verið mögulegt ef fyrirtækin í bæjarfélaginu hefðu ekki verið tilbúin að styðja félagið í þessu stóra verkefni. „Það er svo skemmtilegt að þegar maður tekur svona að sér hvað það eru margir sem eru tilbúnir til að aðstoða mann og hlaupa undir bagga,“ segir hann.

Janus segir klúbbinn renna svolítið blint í sjóinn með mótið í júlí. „Í raun höfum við ekki hugmynd um hversu margir skrá sig til leiks. Það er opið fyrir skráningu fram á fimmtudagskvöld fyrir mótið þannig að það er ekki fyrr en á föstudagsmorgun sem við vitum nákvæman fjölda. Það skiptir hins vegar ekki máli þannig lagað því vinnan við mótið er sú sama hvort sem keppendur eru tíu eða sjötíu. Við erum að vonast til þess að fá 60 til 80 keppendur á mótið,“ segir Janus. Hann bendir líka á slíkum mótum fylgir oft talsverður fjöldi áhorfenda og segist bjartsýnn á að mótsdagurinn verði mjög skemmtilegur.

Keppt í mótorkrossi í Ólafsvík síðar í mánuðinum