Þorsteinn Jóhannsson sérfræðingur í loftgæðum hjá Umhverfsisstofnun brýnir fyrir fólki, í samtali við fréttavefinn Vísi, að tileinka sér að kanna loftgæði í nágrenni við sig vegna mengunar frá eldgosinu í Geldingadölum. Fólk með öndunarfærasjúkdóma eigi að forðast útiveru þegar mengun er mikil. Búast megi við færri sólardögum í sumar vegna gosmóðu og þoku. Síðustu daga hefur minna sést til sólar á suðvestan- og vestanverðu landinu vegna gosmóðu. Þorsteinn segir að hún hafi mælst í nokkrum styrk.

„Gosmóða er þá ekki þessi venjulegi gosmökkur sem kemur beint frá gosinu sem er fyrst og fremst brennisteinsgas. Þetta getur verið gamall eða þroskaður mökkur sem er búinn að þvælast um í 3-4 daga rétt fyrir utan land og kemur svo inn aftur og þá er hann búinn að breytast í brennisteinsagnir. Þær brjóta ljósið þannig að þetta sést sem þokumóða,“ segir Þorsteinn í samtali við Vísi.

Þessar brennisteinsagnir sem Þorsteinn nefnir hafa gert fólki lífið leitt. Þannig eru dæmi um að málning á nýmáluðum sólpalli í uppsveitum Borgarfjarðar hafi skemmst og ástæðan talin vera brennisteinsagnir sem bíta sig inn í málninguna.

Hægt er að fylgjast með mengun á vefnum Lofgæði.is. Þar gefa litamerki til kynna styrk mengunar sem fólk þarf að varast, einkum þeir sem eru veikir fyrir í lungum. „Astmasjúklingar og fólk með undirliggjandi lungnasjúkdóma getur alveg fundið fyrir versnun á sínum sjúkdómum. Ef þetta gos verður viðvarandi þurfum við að setja okkur í loftgæðagosgír og fylgjast vel með. Það er ekki hægt að mæla með því að hlaupa langhlaup í mikilli mengun oftast hægt að fara milli húsi en viðkvæmt fólk ætti að forðast útiveru ef það er mikil gosmóða,“ segir Þorsteinn í viðtali við Vísi.

Sjá frétt á visir.is um málið

Gosmistur getur verið skaðlegt fólki með undirliggjandi öndunarfærasjúkdóma