Sunnudaginn 4. júlí kl. 16 mun Tríó Amasía flytja tónlist millistríðsáranna á sumartónleikum í Hallgrímskirkju í Saurbæ.

Nýstofnað kammertríó að nafni Tríó Amasia hefur m.a komið fram á tónleikum sem haldnir voru undir merkjum Lista- og menningarhátíðar Hafnarfjarðar, Björtum dögum og í Sumartónleikaröð Hólakirkju en þessi skemmtilega hljóðfærsamsetning gefur tilefni til einstaks samhljóms. Tríóið flytur aðallega tónlist sem hefur skírskotun í ýmis þjóðlög og dansa og er jafnan stutt í suður-amerískan og Balkan hryn hjá tríóinu.

Tríó Amasia skipa þau Hlín Erlendsdóttir fiðluleikari, Ármann Helgason klarinettuleikari og Þröstur Þorbjörnsson gítarleikari.

Efnisskrá tónleikanna samanstendur af litríkum tónum fyrir fiðlu, klarinettu og gítar. Tónverkin eiga það sameiginlegt að vera samin undir áhrifum tónlistar millistríðsáranna en í þeim má heyra fjölmörg ólík stílbrigði, áhrif frá franskri kaffihúsa- og götutónlist og djassi en á tónleikunum heyrast þjóðlög frá Ungverjalandi, Spáni, Danmörku, Svíþjóð og Armeníu ásamt dönsum frá Kúbu og Suður-Ameríku auk argentískrar tangótónlistar. Tónsmiðirnir sem eiga verk á efnisskránni eru Laurent Boutros, Béla Bartók, Ferdinant Rebay og Astor Piazzolla.

Aðgangseyrir er 2.500 kr.

Að loknum hverjum tónleikum bjóða veitingastaðir í nágrenninu, Hótel Glymur, Hótel Laxárbakki, Bjarteyjarsandur og Hernámssetrið upp á ýmis tilboð á mat o.fl. fyrir tónleikagesti.

Um Hallgrímskirkju í Saurbæ

Hallgrímskirkja í Saurbæ er sögulega og menningarlega mikilvægur staður fyrir Íslendinga en þarna bjó Hallgrímur Pétursson og samdi Passíusálmana sem eru dýrgripir í menningarsögu Íslands. Það er því dýrmætt að halda þessum stað lifandi og fjölbreyttum en starfsemi hefur verið í lágmarki undanfarin ár. Í kirkjunni er fallegt orgel og flygill en húsið hefur mjög fallegan hljómburð og ber vel ýmsa gerð af tónlist.

Ágóði tónleikahaldsins hefur m.a. skilað sér í góðu hljóðkerfi í húsinu. Framkvæmdir eru hafnar við kirkjuna, verið er að mála hana að utan, viðgerðir á gluggum væntanlegar og framundan eru fleiri framkvæmdir til varðveislu þessa merka og sögulega staðar.

Nánari upplýsingar: https://www.facebook.com/saurbaer

-fréttatilkynning

Tríó Amasia á sumartónleikum í Hallgrímskirkju