Skagamenn tóku á móti liði Keflavíkur á Akranesvelli í Pepsí Max deild karla í knattspyrnu í gær. Leikurinn var afar mikilvægur báðum liðum og þá sérstaklega heimamönnum sem þurftu nauðsynlega á sigri að halda til þess að rífa sig af botni deildarinnar.

Skagamenn byrjuðu leikinn af krafti og strax á 4. mínútu átti Alex Davey hörkuskalla í þverslá og hrökk boltinn fyrir fætur Morten Beck Andersen sem skaut á markið en Keflvíkingar náðu að bjarga á marklínu. En heimamenn náðu sanngjarnt forystunni í leiknum skömmu síðar þegar Gísli Laxdal Unnarsson skoraði af öryggi eftir að Morten Beck náði að senda boltann á hann. Eftir markið gerðu gestirnir harða hríð að marki Skagamanna og aðeins einni mínútu eftir markið varði Árni Marinó, markvörður ÍA, mjög vel frá Christian Voleski sem var kominn einn inn fyrir vörn Skagamanna. Eftir tæplega hálftíma leik kom Ísak Snær Þorvaldsson Skagamönnum í 2:0 þegar hann skoraði af stuttu færi eftir að Óttar Bjarni skallaði boltann fyrir fætur hans eftir langt innkast frá Alex Davey.

En Keflvíkingar komu sér betur inn í leikinn og náðu betri tökum á miðjunni og herjuðu á heimamenn og fimm mínútum eftir annað mark Skagamanna náðu þeir að minnka muninn þegar þeir fengu dæmda aukaspyrnu rétt utan vítateigs. Joey Gibbs tók spyrnuna og Árni Marinó varði vel en hélt ekki boltanum og Christian Voleski var fyrstur að átta sig og skoraði af stuttu færi. Staðan því 2:1 fyrir Skagamenn í hálfleik.

Keflvíkingar komu af krafti inn í síðari hálfleikinn og náðu að jafna metin þegar aðeins sjö mínútur voru liðnar af síðari hálfleik og var þar Magnús Þór Magnússon að verki með skalla eftir hornspyrnu. Í kjölfarið voru Skagamenn slegnir út af laginu og Keflvíkingar urðu líklegri til að ná inn sigurmarkinu. En Skagamenn náðu að vinna sig inn í leikinn að nýju og fengu langbesta færið til þess að tryggja sér sigurinn þegar Sindri Kristinn, markvörður Keflvíkinga, varði glæsilega þrumuskalla frá Morten Beck og boltinn barst til Ísaks Snæs sem þrumaði honum í þverslána. Leikurinn fjaraði síðan út þrátt fyrir að bæði lið leggðu sig fram um að tryggja sigurinn í lokin.

Í liði Skagamanna var Alex Davey þeirra besti maður. Var öruggur í vörninni og Ísak Snær og Árni Marinó í markinu áttu einnig góðan leik.

Jóhannes Karl Guðjónsson, þjálfari Skagamanna, sagði í viðtölum eftir leikinn að það hefði verið erfitt að kyngja því að missa niður tveggja marka forystu í leiknum. Var hann sérstaklega óánægður með fyrra markið sem gaf Keflvíkingum líflínu. Þar hefðu leikmenn sínir ekki verið á tánum, en bætti því við að hann taldi lið sitt hafa verið óheppið að ná ekki að landa sigrinum undir lokin því þeir hefðu þá verið mun líklegri. Einnig hældi hann frammistöðu Árna Marinós Einarssonar markvarðarins unga sem lék sinn fyrsta leik í efstu deild með Skagamönnum.

Jafntefli í botnbaráttuleik