Byggðarráð Borgarbyggðar fjallaði á fundi sínum síðastliðinn fimmtudag um tillögu að vinnslutillögu á Aðalskipulagi Borgarbyggðar 2010-2022, sem snertir Húsafell. Lögð var fram vinnslutillaga sem dagsett er 7. júní 2021 og unnin af Alta. Í tillögunni er landnotkun skilgreind fyrir verslun, þjónustu, íbúða- og frístundabyggð sunnan þjóðvegar í Húsafelli. „Markmið breytingartillögunnar er að skilgreina landnotkun svæðisins og samgöngukerfi þannig að menningarstarfsemi, búseta, ferðaþjónusta, auðlindanýting og frístundabyggð geti lifað í sátt og samlyndi með áherslu á menningarlega reisn og einstakt náttúrufar Húsafells,“ eins og segir í bókun byggðarráðs.

Byggðarráð, fyrir hönd sveitarstjórnar, samþykkti framlagða vinnslutillögu og fól skipulagsfulltrúa að kynna hana í samræmi við 2. mgr. 30. gr. skipulagslaga nr. 123/2010 fyrir íbúum og hagsmunaaðilum og leita umsagna lögbundinna umsagnaraðila. „Um fullnaðarákvörðun innan sveitarfélagsins er að ræða,“ segir í bókun byggðarráðs.

[Fréttin var uppfærð kl. 13:40]

Sjá tillögu að breytingu á aðalskipulagi hér að neðan:

Samþykktu vinnslutillögu að breytingu aðalskipulags í Húsafelli til kynningar