Sumartónleikaröð í Hallgrímskirkju í Saurbæ halda áfram á sunnudag. Þá mun píanóleikarinn Hjörtur Ingvi Jóhannsson flytja eigin verk undir nafninu 24 myndir.

„Hjörtur Ingvi Jóhannsson hefur komið víða við, er hljómborðsleikari í hljómsveitinni Hjaltalín og er virkur í tónlistarlífi landsins, þ.á m. sem sjálfstæður lagasmiður, undirleikari, útsetjari, í hinum ýmsu hljómsveitum og í leikhúsum. Hjörtur hefur unnið með listamönnum eins og Snorra Helgasyni, Kúbus, Katrínu Halldóru, Sigríði Thorlacius, Bubba Morthens, auk þess að gera tónlist fyrir kvikmyndina Autumn Lights en lag hans, Seconds, komst í úrtak laga til að vera tilnefnt til Óskarsverðlauna 2017. Upp á síðkastið hefur hann einbeitt sér að 24 myndum,“ segir í tilkynningu.

Verkefnið

„Talan 24 kemur víða fyrir, bæði í tónlist og annars staðar. Það eru 24 tímar í sólarhringnum en það eru einnig 24 tóntegundir ef taldar eru bæði dúr og moll. Á þessum tónleikum spinnur Hjörtur á staðnum stuttar tónsmíðar úr öllum tóntegundum á píanó í ákveðinni röð, auk þess að flytja valin lög sem áður hafa komið út, sem hluti af verkefninu.

24 myndir er verkefni sem byggist á því að gefa út 24 lög í fyrirfram ákveðinni röð, auk þess að halda spunatónleika þar sem allt verður til á staðnum. Nú þegar hafa 6 lög verið gefin út stafrænt, auk þess sem þrír tónleikar hafa verið haldnir, í Reykjavík (Listasafni Íslands og Mengi) og á Akureyri. Nýlega kom út tónlistarmyndband við lagið Cascade sem má finna á Youtube.“

Tónleikarnir hefjast kl. 16:00 og aðgangseyrir er kr. 2.500. Allur ágóði rennur til styrktar staðnum en ágóði tónleikahaldsins hefur m.a. skilað sér í góðu hljóðkerfi í húsinu og framkvæmdir eru hafnar við kirkjuna. Verið er að mála hana að utan, viðgerðir á gluggum væntanlegar og framundan eru fleiri framkvæmdir til varðveislu þessa merka og sögulega staðar. Eftir tónleikana bjóða veitingastaðir í nágrenninu, Hótel Glymur, Hótel Laxárbakki, Bjarteyjarsandur og Hernámssetrið, upp á tilboð á mat og fleira fyrir tónleikagesti.

Sumartónleikar á sunnudaginn