Sýningin Borgarfjarðarblómi, eftir Viktor Pétur Hannesson, verður opnuð í Hallsteinssal í Safnahúsi Borgarfjarðar á morgun, 26. júní. Þar mun Viktor sýna verk sem hann hefur unnið með jurtum úr Borgarfirði. Viktor kemur af Austfjörðum en hefur lengst af búið í Reykjavík en býr í dag á Stokkseyri. Hann útskrifaðist af myndlistarbraut frá Listaháskóla Íslands árið 2012 og er nú að ljúka námi í listfræði frá Háskóla Íslands.

Sumarið 2017 ætlaði Viktor að vinna myndir með þurrkuðum plöntum en óþolinmæðin var of mikil til að bíða í tvær vikur eftir að plönturnar þornuðu. „Ég fékk því hitapressu til að þurrka þær hraðar. En það fór ekki alveg eins og ég hafði ætlað mér og plönturnar soðnuðu bara í eigin vökva,“ segir Viktor og hlær þegar hann rifjar þetta upp. En þegar plönturnar soðnuðu skildu þær eftir sig prent af blöðunum sínum á pappírinn sem þær lágu á. „Þetta þótti mér mögnuð uppgötvun,“ segir Viktor sem setti þá hitapressuna í skottið á bílnum og hélt af stað í Húsafell að gera frekari tilraunir með þessa aðferð. „Þetta er aðferð sem þó byggir á vissum hefðum, bæði þeirri aðferð sem við þekkjum flest þar sem plöntur eru pressaðar og þurrkaðar milli bóka og aðferðum sem eru notaðar við jurtalitun,“ útskýrir Viktor. „Á vorin nota ég litríkar rætur plöntunnar og svo fer liturinn í blómin og blöðin og svo endar sumarið með hátíðlegri berjauppskeru,“ bætir hann við.

Persónuleg þróunarsaga

Síðustu fjögur ár hefur Viktor farið með pressuna á reglulegt flakk um landið og oft staldrað við í Borgarfirði. „Árið 2019 náði ég að fjármagna kaup á húsbíl með hópfjármögnun. Hann er notaður sem ferðavinnustofa í þessum tilgangi. Ég hef gert margar skemmtilegar tilraunir og sýningin er í raun persónuleg þróunarsaga af þeim tilraunum,“ segir Viktor og bætir við að verkin á sýningunni séu öll unnin í Borgarfirði. „Sum verkin eru eins konar stikkprufur, en önnur hafa svo meiri sögu eins og í einni ferð fórum við fjölskyldan í göngu á Eldborg þar sem ég tíndi blómvönd. Þegar við ætluðum svo heim var bíllinn bremsulaus. Við töluðum við bændur á næsta bæ sem björguðu okkur fyrir horn. Á meðan þeir voru að bjarga okkur tíndi ég plöntur við fjósið og úr því urðu myndir sem verða á sýningunni,“ segir Viktor. Sýningin verður opin til 29. júlí á opnunartíma Safnahússins í Borgarnesi, frá kl. 13:00 – 18:00 alla virka daga og 13:00 – 17:00 um helgar. Engin formleg opnun verður á sýningunni en viðburður tengdur henni verður auglýstur síðar.

Sýningin Borgarfjarðarblómi verður opnuð á laugardaginn