Sögufélag Borgarfjarðar hefur nú gefið út Borgfirðingabók 2021. Bókin hefur verið send til áskrifenda, sem eru um 400 talsins. „Bókin er að venju 288 blaðsíður og miðast þykkt hennar við að hún komist inn um bréfalúgur kaupenda. Bókin er einnig seld í lausasölu hjá ritnefnd eða í gegn um fésbókarsíðu Sögufélags Borgarfjarðar,“ segir Ingibjörg Daníelsdóttir sem sæti á í stjórn félagsins. Hún segir að efni nýju bókarinnar sé af fjölbreyttum toga enda höfundar aldrei verið fleiri, eða um fjörutíu talsins. Meðal efnis eru stuttar spaugsögur sem hafa gengið manna á milli í héraðinu, tvær greinar fjalla um jarðfræði, smásögur sem samdar voru í tengslum við Föstudaginn DIMMA og væri hægt að nefna fleira áhugavert efni. Einnig er í bókinni framhald af greinum sem birtust árið 2020.

Í formála bókarinnar segir að umfjöllunarefnið nái aftur í aldir, jafnvel aftur til forsögulegs tíma og síðan allt til dagsins í dag. „Við efnisval er horft til margra annarra þátta t.d. hvaðan af svæðinu efnið er, kyns og aldurs höfunda, jafnvægis milli vísinda, skáldskapar, lista og frásagna. Þannig mætti lengur telja, en grundvöllurinn að þessu öllu er að fólk sé tilbúið að leggja til efni í bókina og að kaupa hana. Það er ánægjulegt hvað lesendur hafa tekið bókinni vel og hvað fólk er jákvætt þegar því hefur verið boðin áskrift að Borgfirðingabók en grundvöllur útgáfunnar byggist að mestu leyti á fastri áskrift. Bókin er samt sem áður seld nokkuð í lausasölu. Einnig er þakkarvert hvað fólk er duglegt að benda ritnefnd á efni sem gæti átt heima í bókinni.“

Ekki oftar Íbúatal

Fyrsta rit Sögufélags Borgarfjarðar var Íbúatal yfir Mýra- og Borgarfjarðarsýslur. Útgáfa þess var nokkuð reglubundin til ársins 2011. „Nú hefur verið tekin ákvörðun að gefa Íbúatalið ekki oftar út. Veigamesta ástæðan er sú að persónuverndarlög gera erfiðara um vik að birta þær upplýsingar sem þar hafa komið fram. Varðandi Borgfirzkar æviskrár, þá er búið að safna saman töluverðu efni sem flokkast undir leiðréttingar og viðbætur við heildarsafnið. Eftir er að leggja lokahönd á það efni og meta og ákveða hvernig útgáfu þess væri best háttað.“

Borgfirðingabók 2021 er komin út