Norðurálsmótinu í knattspyrnu lýkur í dag
Norðurálsmótið í 7. og 8. flokki í knattspyrnu fór fram á Akranesi um helgina. Þetta var í 36. skipti sem mótið er haldið. Mótið hófst 17. júní með keppni í 8. flokki, sem er fyrir 6 ára og yngri. Alls tóku 69 drengjalið þátt og 16 stúlknalið. Eins og fyrr tóku margir þar sín fyrstu skref á knattspyrnuvellinum og fór mótið afar vel fram.
Föstudaginn 18. júní tók við keppni í 7. flokki fyrir 7 og 8 ára krakka og lýkur í dag, 20. júní. Alls taka 210 lið þátt frá 34 félögum. Leikið er í fimm manna liðum. Í fyrsta sinn fer seinni hluti mótsins fram án dómara til að gefa þjálfurum meiri möguleika til að leiðbeina þátttakendum.
Alls taka um 1.750 börn þátt í Norðurálsmótinu í ár sem er met og gerir mótið eitt það fjölmennasta á Íslandi. Fjölmenni hefur verið á Akranesi um helgina og tjaldbúðir á nánast öllum grænum blettum í bæjarfélaginu.
