Akraneskaupstaður greinir frá því á vef sínum í dag að opnunartími Guðlaugar breytist á morgun, laugardag. Jafnframt mun gjaldtaka fyrir aðgang að lauginni hefjast en frítt hefur verið í Guðlaugu frá því að hún var opnuð. Sumaropnun Guðlaugar er þannig að opið er alla virka daga frá kl. 12:00 til kl. 20:00 en um helgar frá kl. 10:00 til kl. 18:00. Sumaropnun gildir til 31. ágúst.

Í tilkynningunni frá Akraneskaupstað segir meðal annars: „Allt frá því að Guðlaug opnaði í desember 2018 hefur gestum boðist að koma án endurgjalds og njóta alls sem svæðið hefur uppá að bjóða. Nú fyrst mun gjaldtaka hefjast, en þá fá börn að 15 ára frítt í Guðlaugu ásamt handhöfum árskorts í Jaðarsbakkalaug.

Hægt verður að kaupa afsláttakort, ásamt vetrarpassa og fjölskyldukorti en þau kort fara í sölu fljótlega. Þá hefur nýr sjálfsali verið settur upp á svæðinu sem fer í notkun fljótlega eftir helgi. Gestir laugarinnar greiða því inni hjá starfsmanni til að byrja með. Vakin er sérstök athygli á því að einungis er tekið við greiðslukortum.“