Skrifað hefur verið undir viljayfirlýsingu milli Stykkishólmsbæjar, atvinnuvega- og nýsköpunarráðuneytisins, Veitna og Acadian Seaplants um samstarf um sjálfbæra atvinnu- og innviðauppbyggingu í Stykkishólmi í tengslum við fyrirhugaða nýtingu þangs í Breiðafirði. Með viljayfirlýsingunni er stoðum rennt undir rannsóknir og vinnslu þangs í Stykkishólmi og verður unnið að því að nýta fyrirliggjandi tækifæri til atvinnu- og verðmætasköpunar á grunni sjálfbærrar nýtingar auðlinda.

Bæjarstjórn Stykkishólms hefur frá 2019 átt í formlegum viðræðum við kanadíska félagið Acadian Seaplants Limited um vinnslu þangs í Stykkishólmi. Acadian Seaplants hyggst stofna íslenskt dótturfyrirtæki til þess að þróa alhliða miðstöð þörungavinnslu í suðurhluta Breiðafjarðar með aðsetur í Stykkishólmi. Lögð verður áhersla á vísindalega nálgun við nýtingu auðlindarinnar með það að markmiði að fullnýta hráefnið með sem minnstum áhrifum á umhverfið samhliða sem mestum svæðisbundnum efnahagslegum ávinningi. Undir samkomulagið undirrita Þórdís Kolbrún R Gylfadóttir ráðherra nýsköpunar og iðnaðar, Jakob Björgvin Jakobsson bæjarstjóri Stykkishólmsbæjar, JP Deveau forstjóri Acadian Seaplants Limited og Jóhannes Þorleiksson forstöðumaður hjá Veitum.

Þang til virðisaukandi framleiðslu

Jakob Björgvin Jakobsson, bæjarstjóri Stykkishólmsbæjar segist fagna þessum áfanga þar sem allir hagaðilar eru sammála um mikilvægi þess að vinna saman að því að nýta fyrirliggjandi tækifæri til atvinnu- og verðmætasköpunar í Stykkishólmi á grunni sjálfbærrar nýtingar auðlinda. „Í þessu verkefni liggja gríðarlega mörg tækifæri fyrir Stykkishólm, svæðið og samfélagið í heild sinni. Hér er um að ræða enn einn liðinn í allri þeirri jákvæðu uppbyggingu sem átt hefur sér stað í Stykkishólmi undanfarin ár. Efnahagslegur og samfélagslegur ábati af fyrirhugaðri starfsemi er augljós, bæði fyrir svæðið og íslenskt samfélag, sem og framtíðar vaxtarmöguleikar og nýsköpun í kringum sjálfbæra auðlindanýtingu Breiðafjarðar. Acadian Seaplants hefur alla burði og þekkingu til að koma á fót og styðja við rannsóknir á efnisinnihaldi þangs með virðisaukandi framleiðslu og nýsköpun að leiðarljósi. Í slíku samstarfi gætu falist enn frekari tækifæri fyrir uppbyggingu virðisaukandi framleiðslu sjávarfangs úr Breiðafirði,“ segir Jakob Björgvin.

„Nálgun okkar á sjálfbæra nýtingu á sjávarplöntum, til að framleiða afurðir sem nýttar eru um allan heim, byggist á rannsóknum okkar og vísindum. Við teljum að aðferðir okkar geti eflt stöðu Íslands á heimsvísu hvað varðar nýtingu á sjávarplöntum. Þetta verkefni mun leiða af sér sterkari innviði um nýtingu jarðvarma í Stykkishólmi og mun auk þess hafa mikla þýðingu fyrir fyrirtæki okkar og aðra framtíðar atvinnustarfsemi á Snæfellsnesi,“ segir Jean-Paul Deveau framkvæmdastjóri Acadian Seaplants Limited.

Viljayfirlýsing um rannsóknir og nýtingu þangs í Stykkishólmi