Norðurálsmótið á Akranesi verður haldið dagana 17.-20. júní. Mótið er fyrir 7. flokk drengja og hefst föstudaginn 18. júní og lýkur sunnudaginn 20. júní. Einnig er mót fyrir 8. flokk drengja og stúlkna sem fer fram á Þjóðhátíðardaginn 17. júní. Spilaður verður fimm manna bolti. Þátttaka á mótinu er mikil en skráðir þátttakendur eru 1.650.

Hlini Baldursson er skrifstofu- og verkefnastjóri Knattspyrnufélags ÍA og segir hann í samtali við Skessuhorn að undirbúningur vegna mótsins hafi gengið vel en verið nokkuð snúinn vegna fjöldatakmarkana sem þeir eru að búast við þegar mótið hefst: „Við höfum verið í startholunum með hvernig síðasta útspil sóttvarnarreglna yrði. Mótið verður með mjög svipuðu sniði og var í fyrra nema að núna þurfum við að skipta keppnissvæðinu í fjögur hólf í stað tveggja sem var í fyrra.“

Í fyrra var ÍA með í fyrsta skipti aukadag fyrir 8. flokk drengja og stúlkna. Hlini segir að það sé að mælast vel fyrir hjá félögunum og að það sé aukning í ár á þessu móti frá því í fyrra. Varðandi mönnun og vaktir á mótinu segir Hlini að það séu gríðarlega mörg störf sem koma að svona einu móti og það hafi bara gengið þokkalega að manna þetta: „En við búum svo vel hérna á Akranesi að aðildarfélög innan Íþróttabandalagsins koma og hjálpa okkur að manna þær vaktir. Staðan er þannig að eingöngu mega vera 300 manns í hverju sóttvarnarhólfi og þar af leiðandi skiptum við þessu upp og má bara vera einn fullorðinn á svæðinu með hverjum iðkanda.“

Hlini segir að lokum að mótið í ár sé stærra en í fyrra. Iðkendur verða í kringum 1.250 í 7. flokks mótinu og yfir 400 í 8. flokks mótinu og við þetta bætast um 200 þjálfarar og liðsstjórar. Þá er töluverð aukning í skráningu á tjaldsvæðunum sem Knattspyrnufélag ÍA sér um. Það er því ljóst að það verður fjör á Akranesi um næstu helgi á Norðurálsmótinu.

Norðurálsmótið í knattspyrnu hefst á morgun