Hluti nemenda Grundaskóla í hreinsunarátakinu. Ljósm. Vefsíða Akraneskaupstaðar

Hreinsuðu hluta af strandlengju Akraness

Nemendur í 10. bekk í Grundaskóla unnu öflugt hreinsunarstarf á dögunum en starfið var unnið í fjáröflunarskyni fyrir útskriftarferð þeirra. Frá þessu er sagt á vefsíðu Akraneskaupstaðar en útskriftarnemar í Grundaskóla hafa ýmist safnað fyrir ferðinni með sölu á brauði í skólanum sem og tekið að sér gangbrautavörslu fyrir yngri nemendur.  Covid faraldurinn setti vissulega strik í reikninginn hjá þeim í ár þar sem brauðsalan var ekki opin og gangbrautargæsla takmörkuð þar sem nemendur voru á víð og dreif um sveitarfélagið vegna framkvæmda á skólahúsnæðinu núna í vor. Þau hreinsuðu til í Kalmansvík að Elínarhöfða, á Breiðinni og Langasandi að Leyni og í Garðalundi og Klapparholti ásamt því að möl var færð til á safnasvæðinu að Görðum. Virkilega vel gert hjá þessum kraftmiklu krökkum að fegra Akranes og nágrenni.

Líkar þetta

Fleiri fréttir