Inga Jóna Pálsdóttir býr á Akranesi en síðustu tvö ár hefur hún varið miklum tíma í Kenía sem sjálfboðaliði á barnaheimilinu Haven Rescue Home, HRH. Heimilið er ætlað ungum barnshafandi stúlkum og mæðrum sem eru 18 ára eða yngri. Heimilið opnaði Anna Þóra Baldursdóttir í maí 2017 og hafa búið þar yfir 70 einstaklinga í lengri eða skemmri tíma. Í dag eru heimilismeðlimirnir 19 talsins. Markmið heimilisins er að aðstoða ungar barnshafandi stúlkur og mæður til að klára skólagöngu og koma undir sig fótunum svo þær geti séð fyrir sér og börnunum sínum sjálfar. Anna Þóra opnaði snapchat reikning þar sem hún sagði frá öllu ferlinu þegar hún var að stofna heimilið og hvernig lífið á heimilinu hefur verið síðan. Inga Jóna hafði fylgst með í um tvö ár áður en hún ákvað að koma sér í samband við Önnu Þóru og um einum og hálfum mánuði síðar var hún komin til Afríku. Þetta var haustið 2019 og nú er Inga Jóna búin að fara þrjár ferðir út.

„Þetta hafði verið draumur hjá mér frá því ég var krakki. Ég ákvað að skrifa Önnu Þóru skilaboð en ég hafði samt aldrei séð það fyrir mér að fara til Kenía. Ég veit ekki af hverju en ég hélt alltaf að ég myndi fara til Vestur Afríku. Það svæði hafði bara heillað mig og ég því lítið skoðað Kenía. Svo kom ég þangað og það er yndislegur staður og fólkið alveg dásamlegt,“ segir Inga Jóna um leið og hún leggur á borð fyrir blaðamann léttan hádegisverð og kaffi. Við spjöllum um lífið í Kenía, heimilið og mikilvægt hlutverk Íslendinga í rekstri heimilisins.

Hægt er að fylgjast með því sem er að gerast á heimilinu á Snapchat undir nafninu annathora, á Instagram og Facebook undir nafninu Styrktarfélag HRH auk þess sem hægt er að fylgjast með Ingu Jónu á Instagram undir nafninu Ingajp4 en hún er dugleg að sýna frá heimilinu. Einnig er hægt að styrkja heimilið beint með að leggja inn á reikning: 537-14-407270, kennitala: 450315-1760.

Rætt er við Ingu Jónu um lífið í Kenía í Skessuhorni sem kom út í dag.

Íslendingar gegna mikilvægu hlutverki í rekstri barnaheimilis í Kenía