Kristín Þórhallsdóttir lyftir yfir gildandi Evrópumetum en þarf alþjóðleg mót til að fá árangurinn metinn

Íslandsmeistaramót í kraftlyftingum og klassískum kraftlyftingum var haldið í íþróttahúsinu við Varmá í Mosfellsbæ um helgina. Þar gerði kraftlyftingafólk frá Kraftlyftingafélagi Akraness það gott. Kristín Þórhallsdóttir var stigahæst í flokki kvenna í klassískum kraftlyftingum með 102,78 stig. Þá varð hún einnig Íslandsmeistari í -84 kg flokki kvenna. Hennar þyngstu lyftur voru 210 kg í hnébeygju, 110 kg í bekkpressu og 220 kg í réttstöðulyftu. Samanlagður árangur hennar er því 540 kg, sem er yfir gildandi Evrópumeti. Þyngsta lyftan hennar í hnébeygju var einnig yfir gildandi Evrópumeti en aðeins er hægt að setja alþjóðleg met á alþjóðlegum mótum.

Sylvía Ósk Rodriguez keppti á sínu fyrsta Íslandsmeistaramóti í klassískum kraftlyftingum og varð hún önnur í -84 kg flokki kvenna með 70,2 stig. Þyngst lyfti hún 140 kg í hnébeygju, 77,5 kg í bekkpressu og 150 kg í réttstöðulyftu og var því með 367,5 kg í samanlögðum árangri.

Einar Örn Guðnason var stigahæstur í karlaflokki í kraftlyftingum með búnaði með 89,99 stig. Þá varð hann einnig Íslandsmeistari í -120 kg flokki karla. Hans þyngstu lyftur voru 360 kg í hnébeygju, 260 kg í bekkpressu og 280 kg í réttstöðulyftu, sem gerir samanlagðan árangur 900 kg.

Helgi Arnar Jónsson gerði einnig góða hluti en hann var stigahæsti unglingurinn í klassískum kraftlyftingum með 86,2 stig. Að auki varð hann Íslandsmeistari í -83 kg U23 flokki karla. Hans þyngstu lyftur voru 223 kg í hnébeygju, 125 kg í bekkpressu og 260 kg í réttstöðulyftu sem gerir samanlagðan árangur 608 kg.

Með þessum góða árangri náðu Kristín, Einar og Helgi öll lágmörkum fyrir Heimsmeistaramót og Evrópumeistaramót sem haldin verða síðar á þessu ári.

: Kristín og Sylvía Ósk voru sterkastar í -84 kg flokki kvenna.

: Helgi Arnar Jónsson var stigahæsti unglingurinn auk þess sem hann varð Íslandsmeistari um helgina.

Vestlendingar gera það gott í kraftlyftingum