Á sjávarbakkanum í útjaðri Rifs á Snæfellsnesi stendur gamall olíutankur svolítið einn og yfirgefinn. Hann gegnir ekki lengur upprunalegu hlutverki sínu og hafa núverandi eigendur, Hildigunnur Haraldsdóttir arkitekt og Þórir Gunnarsson matreiðslumaður, sótt um leyfi til þess að breyta tankinum í íbúðarhúsnæði.

Umsóknin var tekin fyrir á fundi umhverfis- og skipulagsnefndar í febrúar en frestað afgreiðslu og byggingafulltrúa falið að senda erindi til brunasviðs Húsnæðis- og mannvirkjastofnunar eða til annarra sambærilegra aðila. Þá benti slökkviliðsstjóri á að vöntun væri aðgengi að slökkvivatni á norðvesturhluta Rifs. Í apríl var umsókn síðan samþykkt með fyrirvara um samþykki Húsnæðis- og mannvirkjastofnunar.

Upphaflega var ætlunin að í tankinum yrði lítil íbúð auk vinnu- og sýningarsvæði fyrir listamenn en að sögn Hildigunnar urðu þau svo heilluð af tanknum að þau ákváðu að allur tankurinn yrði að íbúð. Dæluhús sem stendur við tankinn verður mögulega innréttað sem aðstaða fyrir listamenn. Reiknar Hildigunnur með að framkvæmdir við breytingarnar hefjist á næstunni en klæðning og gluggar eru á leiðinni til landsins.

Hildigunnur og Þórir rekja bæði ættir sínar til Snæfellsness auk þess sem Hildigunnur hefur síðan 1993 unnið að skipulagsmálum fyrir Snæfellsbæ. Þórir er kunnur athafnamaður og hefur rekið veitingastaði bæði á Íslandi og í Tékklandi.

Aðspurð um hvernig hugmyndin hafi kviknað segir Hildigunnur að Þóri hafi lengi langað til að gera upp eyðibýli en henni ekki hugnast hugmyndin. Þau hafi verið að rúnta um á milli þess sem Hildigunnur sat fundi. Hildigunnur benti Þóri þá á þennan olíutank í Rifi. Þegar Hildigunnur kom af næsta fundi hafi Þórir verið búin að gera samning um kaup á olíutanknum. Að hennar sögn leist Hildigunni mun betur á þetta verkefni en eyðibýli. Hyggjast þau verja tíma í framtíðinni í nýju íbúðinni / tanknum enda er útsýnið ekki af lakari tegundinni

Breyta olíutanki í íbúð