Áhrif Covid faraldursins fara nú blessunarlega dvínandi og sjást þess merki víða. Grímuskylda heyrir að mestu leyti sögunni til og fólk kemur nú saman í stærri hópum en um langt skeið. Þá er ánægjulegt að sjá að nokkuð viðamikil dagskrá verður á sjómannadaginn á Akranesi. Sjómannadagsmessa verður í Akraneskirkju, minningarathöfn við minnismerkið í kirkjugarðinum og blómsveigur lagður að minnismerki sjómanna á Akratorgi.

Fjölskylduskemmtun verður á hafnarsvæði bæjarins á sjómannadaginn 6. júní. Þar verður Björgunarfélagið með ýmislegt til sýnis, meðal annars tæki og búnað, sett verður upp línuæfing og vettvagnsstjórnstöð. Bátar félagsins verða á sjó auk þess sem von er á þyrlu Landhelgisgæslunnar. Lifandi fiskar í körum verða til sýnis, hoppukastalar, bátasmíði og götubitar á hjólum bjóða upp á margs kyns veitingar.

Sjósundsfólk býður áhugasömum og hugrökkum að stíga sín fyrstu sundtök í sjó undir leiðsögn. Dorgveiðikeppni og róðrarkeppni verður og félagar í Sigurfara, siglingafélagi Akraness, verða sýnilegir. Auk þessa verða Byggðasafnið að Görðum, Akranesviti og Guðlaug opin og aðgangur ókeypis.

Sjá auglýsingu:

Mikið um að vera á sjómannadaginn á Akranesi