Níu gefa kost á sér í prófkjöri Sjálfstæðisflokksins í Norðvesturkjördæmi, sem fer fram dagana 16. og 19. júní næstkomandi. Töluverðrar spennu gætir í aðdraganda prófkjörs í ljósi þess að núverandi þingmenn sækjast báðir eftir oddvitasæti listans; þau Haraldur Benediktsson og Þórdís Kolbrún R Gylfadóttir.

Frambjóðendur eru nú á ferð og flugi um kjördæmið og halda sameiginlega fundi til að kynna stefnumál sín og áherslur. Meðfylgandi mynd tók Sigríður Ólafsdóttir af hluta frambjóðenda á fundi sem fram fór í Víðihlíð í Húnavatnssýslu í gærkvöldi. Í Skessuhorni vikunnar eru þrír fundir auglýstir á Vesturlandi í næstu viku; í Samkomuhúsinu Grundarfirði þriðjudaginn 8. júní kl. 20, B-59 í Borgarnesi föstudaginn 11. júní klukkan 18 og Golfskálanum Akranesi sama kvöld klukkan 20:30. Í auglýsingunni er jafnframt farið yfir fyrirkomulag og tímasetningu utankjörfundar atkvæðagreiðslu sem fram fer á fimm stöðum í kjördæminu um þessar mundir auk þess sem hægt er að kjósa í Valhöll í Reykjavík.

Frambjóðendur eru:

Bergþóra Ingþórsdóttir 24 ára, nemi, Akranesi
Bjarni Pétur Marel Jónasson 21 árs, starfsmaður Eyrar, Ísafirði
Guðrún Sigríður Ágústsdóttir 47 ára, ráðgjafi, Reykjavík
Haraldur Benediktsson 55 ára, alþingismaður og bóndi, Hvalfjarðarsveit
Magnús Magnússon 48 ára, sóknaprestur, Húnaþingi vestra
Sigríður Elín Sigurðardóttir, 20 ára, sjúkraflutningakona og nemi, Akranesi
Teitur Björn Einarsson, 41 árs, lögmaður, Skagafirði
Þórdís Kolbrún Reykfjörð Gylfadóttir 33 ára, ráðherra, Kópavogi
Örvar Már Marteinsson 45 ára, skipstjóri, Ólafsvík

Frambjóðendur í prófkjöri á ferð og flugi