„Hér gerðust undur og stórmerki. Mjöll okkar bar þremur kálfum og allir eru þeir lifandi. Dýralæknir ætlaði ekki að trúa þessu,“ skrifaði Guðrún Esther Jónsdóttir bóndi á Miðskógi í Dölum á Facebook síðu sína í gær. Skúli Hreinn Guðbjörnsson bóndi og eiginmaður hennar tók meðfylgjandi myndir. Kálfarnir eru tvö naut og ein kvíga, en í slíkum tilfellum er kvígan að öllum líkindum óbyrja.

Skúli bóndi segir í samtali við Skessuhorn að enginn hafi átt von á þessari frjósemi hjá Mjöll. Hún hafi verið lengi veik í aðdraganda burðar og raunar leiðst þófið og komið sér út á tún að bíta gras þar sem kýrnar liggja við opið. „Við ákváðum að kalla til dýralækni þar sem við áttum allt eins von á því að kálfurinn væri dauður í henni. Dýralæknirinn í Búðardal var veikur þannig að við fengum Hjalta Viðarsson dýralækni í Stykkishólmi til að koma. Fyrsti kálfurinn kom öfugur, sá númer tvö sneri rétt en sá síðasti kom einnig öfugur. Kýrin hefði því aldrei getað borið þeim nema með aðstoð,“ segir Skúli.

Afar fátítt er að kýr beri þremur kálfum og mögulega einsdæmi að þeir hafi þá allir lifað, eins og í tilfelli kálfanna hennar Mjallar frá Miðskógi.

Mjöll er hin hressasta eftir burðinn, en vissulega dáldið tekin eftir burð sem tók marga klukkutíma. Ljósm. shg.

Mjöll á Miðskógi bar þremur kálfum sem allir lifa