Grásleppuveiðar máttu hefjast við innanverðan Breiðafjörð síðastliðinn fimmtudag. Héldu tólf bátar strax til veiða frá Stykkishólmi. Þeir Páll Aðalsteinsson og Álfgeir Marinósson lönduðu á mánudaginn grásleppu úr Önnu Karínu SH eftir þrjár nætur. Þeir höfðu alls ellefu tunnur með sér út en þær dugðu ekki til. Þeir komu því að landi með talsvert af óskorinni grásleppu sem þeir skáru í tunnur við bryggju.

Að sögn Hrannars Péturssonar hafnarstjóra fara grásleppuveiðarnar mjög vel af stað og bátarnir hafa verið að koma smekkfullir að landi. Fúsi SH landaði til að mynda sjö tonnum um helgina sem fengust í aðeins helming af netunum sem skipverjar lögðu. Fengu þeir 560 grásleppur í eina trossu. Sumarliði Ásgeirsson, tíðindamaður Skessuhorns, var við höfnina á sunnudaginn og tók meðfylgjandi myndir þegar landað var úr Önnu Karínu SH.

Góð grásleppuveiði hjá Önnu Karínu SH.

Skorið í tunnur við höfnina