Rúmenska listakonan Adelina Ivan er stödd í Grundarfirði þessa dagana þar sem hún vinnur að list sinni fyrir sýningu sem verður um næstu helgi. Adelina kom til landsins 13. maí síðastliðinn og kom til Grundarfjarðar þremur dögum síðar. Hún er stödd hér á landi í samstarfi við ArtAk350 sem rekur listavinnustofu í Grundarfirði. Adelina mun sýna afrakstur vinnunar áður en hún heldur af landi brott.

„Ég fékk styrk frá EEA Grants 2014-2021 sem er í samstarfi með Íslandi, Liectenstein og Noregi í gegnum Ro-Culture prógrammið,“ segir Adelina í stuttu spjalli við Skessuhorn. „Ég lærði í listaháskólanum í Búkarest og starfa þar.“ Adelina leigir rými í gömlu aflögðu fangelsi í Búkarest sem heitir Malmaison. Þar eru um fjörutíu listamenn sem reka stúdíó og fimm listagallerý þar sem listamennirnir geta selt list sína. „Ég nota mikið hnit í minni vinnu og vil skapa jafnvægi á milli sterkra og veikra póla,“ segir Adelina er hún reynir að útskýra verkin sín fyrir fréttaritara. Hún notar mikið efni úr fatnaði og vinnur mikið með línur í verkum sínum. Einnig notast hún mikið við myndbandstækni. Adelina hefur lífsviðurværi sitt af listinni en hefur þó þurft að grípa í fatasaum til að láta enda ná saman. „Ég vann við fatahönnun á árum áður og hef þurft að grípa í það annað slagið.“

Tvíhyggja líkamans sem landslag

Listakonan Adelina ber saman eftirlíkingu og hið náttúrlega ásamt því að vitna í form og lögun mannslíkamans í innsetningu sinni. Hún dregur innblástur úr íslenskri náttúru þar sem fjöllin í bakgrunni ramma inn salthaug þar sem komið hefur verið fyrir gler skúlptúr sem minnir samtímis á línur landslagsins í kring og útlínur mannveru. Í skissum og teikningum sem hún sýnir á vinnustofu sinni samhliða innsetningunni tileiknar hún síendurteknum hreyfingum þar sem línulegur gangur tímans er afhjúpaður. Huglæg form lýsa tvíhyggju líkamans sem landslagi, auk þess sem þau ná að fanga einfaldsleika náttúrunnar í línum. Grundvöllur listrænnar tjáningar Adelinu er félagsleg og menningarleg gagnrýni á hefðbundnar birtingarmyndir kvenlíkamans. Hún notar líkamann til þess að sýna jafnvægi milli styrks og veikleika, varnarleysis og verndar, hverfulleika og varanleika, ásamt því að miðla hugmyndum um hrynjanda og endurteknar hreyfingar segir í lýsingu sýningarinnar.

Sýning opin í tvo daga

Adelina er með ákveðnar hefðir til að byrja daginn og fá innblástur. „Ég byrja hvern dag á að dansa og svo hleyp ég mikið,“ segir hún en hún hefur verið heppin með veður til útivistar á meðan hún hefur dvalið í Grundarfirði. Adelina segist fá aðstoð frá listamönnum á svæðinu og hefur Þóra Karlsdóttir séð um að útvega allt það efni sem til þarf í verkin. Það verður spennandi að sjá afraksturinn á sýningunni um næstu helgi en hún verður opin föstudaginn 28. maí frá 17:00 til 20:00 og á laugardaginn frá 14:00 til 17:00. Sýningin ber heitið „A line that waeves and winds“ og er til húsa á Grundargötu 26 í Grundarfirði.

Rúmensk listakona heldur sýningu í tvo daga í vikulokin