Síðdegis í gær mætti Guðmundur Ingi Guðbrandsson umhverfis- og auðlindaráðherra í Skorradalinn. Erindið var að skrifa undir friðlýsingu votlendissvæðis Fitjaár. Nú er það því orðið að friðlandi í skilgreiningu laga um náttúruvernd.

Friðlýsingin miðar að því að vernda víðlent, samfellt og lítið raskað votlendissvæði við Fitjaá þar sem skiptast á mýrar og flóar. Svæðið gegnir fjölbreyttu hlutverki í vistkerfum og er meðal annars mikilvægt búsvæði plöntu- og fuglategunda. Starungsmýravist, sem er blautt, þýft mýrlendi vaxið mýrastör og fleiri votlendistegundum, er helsta votlendisvistgerð svæðisins og hefur mjög hátt verndargildi. Við ósa Fitjaár er jafnframt fjölbreytt fuglalíf sem hefur einnig mikið verndargildi.

Framdalssystur, þær Ingibjörg á Háafelli og Hulda á Fitjum, buðu upp á veitingar að lokinni undirskrift. Hér sker Árni Hjörleifsson oddviti fyrstu sneiðina af glæsilegri brauðtertu.

„Ég fagna frumkvæði heimafólks á Fitjum í Skorradal að friðlýsingu þessa einstaka svæðis hér í botni Skorradals. Heimafólk á Fitjum hefur hlúð að því í gegnum tíðina meðal annars með því að óska eftir því við Náttúrufræðistofnun Íslands að rannsaka gróðurfar votlendisins sérstaklega. Í mati stofnunarinnar segir að það fari ekki á milli mála að votlendið við árósa Fitjaár, þar sem áin fellur í Skorradalsvatn, sé mikið náttúrudjásn. Því er ég sammála. Og þar sem votlendissvæði eiga víða undir högg að sækja er mikilvægt að tryggja vernd þeirra til framtíðar enda gegna þau mikilvægu hlutverki í vistkerfinu,“ sagði Guðmundur Ingi Guðbrandsson, umhverfis- og auðlindaráðherra við þetta tækifæri.

Systkinin K. Hulda og Jón Arnar Guðmundsbörn eru eigendur Fitja. Hulda sagði í samtali við blaðamann að nú væru þrír áratugir frá því þau lögðu grunn að þeirri friðlýsingu sem nú hefur formlega verið staðfest. „Ég er afskaplega ánægð með að þessum áfanga sé náð. Tilfinningin er ekki ósvipuð og að útskrifa barn úr skóla,“ sagði Hulda. Undirbúningur að friðlýsingunni var unnin að frumkvæði eigenda Fitja en í samstarfi Umhverfisstofnunar, Skorradalshrepps, umhverfis- og auðlindaráðuneytisins, Skógræktarinnar og Ríkiseigna.

Ráðherra friðlýsti votlendissvæði Fitjaár