Skagamenn unnu afar mikilvægan 3:1 sigur gegn HK í Kórnum í Kópavogi í gærkvöldi þegar liðin áttust við í Pepsí Max deildinni í fótbolta. Í harðri baráttu í neðri hluta deildarinnar er afar mikilvægt að sigra liðin sem eru á svipuðum slóðum og það gerðu Skagamenn örugglega.

Heimamenn í HK fengu draumabyrjun og náðu forystunni strax á 8. mínútu þegar Arnþór Ari Atlason skoraði með hnitmiðuðu skoti í bláhornið. En Skagamenn gáfust ekki upp og fengu vítaspyrnu á 25. mínútu þegar brotið var á Morten Beck Andersen innan vítateigs og vítaspyrna dæmd. Þórður Þorsteinn Þórðarson skoraði úr spyrnunni, stöngin inn og staðan orðin jöfn 1:1, og þannig var hún í hálfleik.

Heimamenn komu til leiks í síðari hálfleik af miklum krafti og sóttu ákaft að marki Skagamanna og áttu meðal annars skot í stöng og slá, en Skagamenn vörðust vel og nýttu sitt fyrsta alvöru marktækifæri vel á 72. mínútu þegar Viktor Jónsson skoraði af öryggi eftir að hafa lagt boltann fyrir sig eftir góða fyrirgjöf frá Halli Flosasyni. Eftir markið reyndu heimamenn að herða sóknina og sækja jöfnunarmarkið, en Skagamenn voru þá komnir með góð tök á leiknum og hleyptu þeim ekkert of nálægt markinu. Það var síðan hinn ungi Ingi Þór Sigurðsson sem gulltryggði sigurinn í uppbótartíma með ævintýralegu marki af 40 metra færi. Hann sá að markvörður HK var kominn út úr markinu og vippaði boltanum með viðstöðulausu skoti í háum boga í markið. Vel gert hjá þessum unga og efnilega leikmanni og með sitt fyrsta mark í efstu deild eftir að hafa komið inn á sem varamaður skömmu áður.

En áður en Ingi Þór gekk frá leiknum fékk Hallur Flosason að líta rauða spjaldið hjá dómara leiksins fyrir brot á leikmanni HK. Dómarinn gaf Halli gula spjaldið en breytti því svo í rautt eftir að hafa ráðfært sig við línuvörðinn. Sitt sýndist hverjum um þessa ákvörðun.

Skagamenn léku þennan leik af skynsemi. Vörðust vel og beittu skyndisóknum en hefðu mátt halda boltanum betur töpuðu honum oft á tíðum of fljótt með ónákvæmum sendingum. En heilt yfir góður baráttusigur. Jóhannes Karl Guðjónsson þjálfari Skagamanna var ánægður í viðtölum eftir leikinn. Hann hældi liðinu fyrir góða baráttu og andlegan styrk á erfiðum útivelli en sagði þó að liðið hefði oft leikið betur en það gerði í Kórnum en úrslitin samt afskaplega mikilvæg.

Mikilvægur sigur Skagamanna gegn HK