Aðalfundur Skógræktarfélags Borgarfjarðar var haldinn sunnudaginn 2. maí síðastliðinn. Þar hætti Óskar Guðmundsson sem formaður félagsins og tók Pavle Estrajher við keflinu. Laufey Hannesardóttir verður áfram gjaldkeri, Ragnheiður Freysteinsdóttir er markaðsstjóri, Sigursteinn Sigurðsson meðstjórnandi og Hafdís Huld kemur ný inn í stjórnina, einnig sem meðstjórnandi. Loks verður Friðrik Aspelund framkvæmdastjóri félagsins í verktakavinnu.

Félagar SB eru um 150 talsins og hefur félagið í sinni umsjón fjögur skógræktarsvæði innan Borgarbyggðar: Einkunnir, Daníelslund, Reykholt og Grafarkot. Að sögn Pavle, nýs formanns SB, þá er markmið félagsins ávallt að fá fleiri félaga inn í starfið en meirihluti starfseminnar er í sjálfboðavinnu að undanskildum framkvæmdarstjóra sem er í um 30% starfi. Hefur stjórn SB áætlanir um að bæta við félögum með því að skipuleggja viðburði á skógræktarsvæðum sínum sem vekja vonandi áhuga fólks á útivist, sveppatínslu, náttúruvernd og fleiru.

Vilja byrja framleiðslu

Ýmis mál eru á dagskrá hjá nýrri stjórn skógræktarfélagsins. Stefnt er á að hefja framleiðslu á hráefni úr borgfirskum viði og er áætlað að hefja framleiðslu á eldivið svo dæmi sé tekið. Til þess þarf félagið húsnæði en Pavle segir að búið sé að senda fyrirspurn á Borgarbyggð og beðið sé svara hvað það varðar. Hann segir engu að síður brýna nauðsyn að fá húsnæði til að hægt sé að fara af stað með framleiðslu yfir höfuð og vill ólmur senda orð út í kosmósið, að ef einhver veit um húsnæði fyrir félagið að þá má hafa samband við hann. Hugmyndin með að hefja framleiðslu er til að nýta allt hráefni til fulls eins og þegar skógar eru grisjaðir, að allt efni sé endurnýjað á einn eða annan hátt. Pavle segir möguleikana nokkra og væri hægt að bæta trjákurli og spæni við framleiðsluna síðar meir, verði af þessu.

Samstarf við Ferðafélag Borgarfjarðar

Skógræktarfélag Borgarfjarðar og Ferðafélag Borgarfjarðar munu sameina krafta sína og fara í samstarf til að betrumbæta gönguleiðir í fólkvanginum Einkunnum við Borgarnes. Ákveðið hefur verið að ferðafélagið muni fara yfir gönguleiðir í Einkunnum, merkja og endurnýja stikur þar sem við á og lagfæra skilti til að auðvelda gestum að rata um svæðið og nýta það til fulls. Að auki hefur landvörður landshlutans kynnt fyrir skógræktarfélaginu ákveðna verndaráætlun og fór yfir hvað mætti betur fara í Einkunnum. Loks er búið að hefja viðræður við Skógræktarfélag Akraness um mögulegt samstarf til að nýta tækjakost sem þarf að hafa til að viðhalda útivistarsvæðum á borð við Einkunnum í Borgarnesi og Garðalundi á Akranesi.

Skógræktarfólk vill vekja áhuga fólks á útivist