Bæjarstjórn Akraness samþykkti nýlega lýsingu fyrir gerð deiliskipulags Skógahverfis sem nefndir eru áfangar 3C og 5. Skipulags- og umhverfisráð samþykkti á fundi sínum 17. maí að skipulagsgögnin vegna þessara nýju áfanga í Skógahverfi verðir kynnt á almennum kynningarfundi. Undanfarin ár hefur meginuppbyggingarsvæði íbúðabyggðar á Akranesi verið í Skógahverfi. Rrammaskipulag hverfisins var unnið árið 2005 og voru fyrstu tveir deiliskipulagsáfangar þess unnir í samræmi við það.

Í þessum nýju áföngum er gert ráð fyrir blandaðri byggð og lögð verður áhersla á blöndu einnar og tveggja hæða sérbýlishúsabyggðar (einbýlishús og raðhús) og lítilla fjölbýlishúsa, aðallega tveggja hæða. Hærri fjölbýlishús eru möguleg sem markviss og rökstudd frávik þar sem þau gætu farið vel í bæjarmyndinni. Jafnframt er gert ráð fyrir stofnunum, þjónustufyrirtækjum og atvinnustarfsemi sem viðeigandi eru í íbúðarhverfi. Líklegt er að fjöldi íbúða í hverfinu verði á bilinu 440 til 550. Það þýðir að ef miðað er við 3,98 manna vísitölufjölskyldu gæti hverfið rúmað á bilinu 1.750 til 2.190 íbúa.

Stór útivistarsvæði liggja að hverfinu í norðri og austri. Útivistarskógur er í ræktun norðan hverfisins sem verður virkt leik- og útivistarsvæði auk þess sem hann skýlir hverfinu fyrir norðanátt og gagnvart þjóðveginum. Garðalundur er í um 500 m fjarlægð frá miðju hverfisins. Sunnan hans og austan er 18 holu golfvöllur í Leyni. Suðurmörk Skógahverfis liggja að safnasvæðinu í Görðum.

Skipulagssvæðið er þurrkaður flói, Garðaflói, sem áður var hluti umfangsmikils votlendissvæðis. Landið var ræst fram og ræktað á fyrri hluta og um miðbik síðustu aldar. Athygli vekur að talsvert dýpi er niður á fastan grunn, Allt frá 1,7 m upp í 25 metra. Þá verða notaðar svokallaðar blágrænar ofanvatnslausnir sem eru aðferðir til að veita ofanvatni í þéttbýli á náttúrulegan hátt niður í jarðveginn. Þær líkja eftir náttúrulegri hringrás vatns í stað þess að veita ofanvatninu í niðurföll og leiða það í lögnum neðanjarðar frá svæðinu og út í sjó, ár eða vötn.

Við útfærslu lagna í nýjum götum verður gert ráð fyrir að ofanvatn, bæði af götum og húsþökum verði leitt út í vatnsfarvegi. Þeir verða mótaðir þannig að þeir geti tekið við leysingavatni í asahláku og mikilli úrkomu en einnig útfærðir m.t.t. öryggis þannig að ekki verði hætta á slysum þeirra vegna. Landið verður hækkað um u.þ.b. einn metra og til þess notað efni úr húsgrunnum og götustæðum. Vatnsfarvegir innan byggðar verða mikilvæg útivistarsvæði. Þar verða göngustígar í grónu umhverfi með lækjarfarvegum og settjörnum.

Á kynningartíma verður almenningi og umsagnaraðilum gefinn kostur á að koma með ábendingar og sjónarmið um fyrirhugaða deiliskipulagsvinnu. Kynningartími og skilafrestur ábendinga kemur fram í auglýsingu og á vefsíðu Akraneskaupstaðar.

Hlekkur á skipulagslýsinguna:

https://www.akranes.is/static/files/5.Skipulag/Skipulag_i_kynning/210427-skogahv_3c-5-lysing-a4.pdf

Kynna deiliskipulagslýsingu tveggja áfanga í Skógahverfi