Nýir eigendur Eðalfisks ehf. í Borgarnesi.

Kaup Brimilshólma á Eðalfiski gengin í gegn

Fyrirtækið Brimilshólmi frá Akranesi hefur gengið frá kaupum á öllu hlutafé í Eðalfiski ehf. í Borgarnesi og tekið við rekstri félagsins. Eðalfiskur ehf. sérhæfir sig eins og kunnugt er í framleiðslu, sölu og dreifingu á ferskum, frystum, reyktum og gröfnum laxaafurðum þar sem stór hluti afurða fyrirtækisins er seldur á erlendum mörkuðum. Jafnframt eru þessar afurðir vinsælar á innanlandsmarkaði ásamt reyktum silungi, reyktri Egilssíld og Eðal graflaxsósu.

„Á bak við Brimilshólma, sem kaupir Eðalfisk, er öflugur hópur sem veðjar á framtíðarsýn til sóknar á erlenda markaði og við höfum mikla trú á tækifærum á innanlandsmarkaði. Við sjáum tækifæri í hollu mataræði og aukinni fiskneyslu og viljum styðja við viðskiptavini okkar og skapa þeim virði í sinni starfsemi. Þetta er sami hópur og kom að kaupum á Norðanfiski ehf. á síðasta ári sem er líka traust og gott félag sem þjónustar stóreldhús, verslanir og veitingastaði á innanlandsmarkaði. Ég vil þakka eigendum Eðalfisks fyrir faglega vinnu í þessu söluferli,” segir Inga Ósk Jónsdóttir í tilkynningu fyrir hönd Brimilshólma.

„Rekstur Eðalfisks á sér langa og farsæla sögu í Borgarnesi sem við erum stolt af og við fögnum því að kaupendur séu öflugur hópur og höfum við fulla trú að félagið muni halda áfram að vaxa og dafna með nýjum eigendum,“ segir Kristján Rafn Sigurðsson framkvæmdastjóri og einn núverandi eigenda Eðalfisks. Ráðgjafar kaupenda í ferlinu voru KPMG og Benedikt Bogason hjá Nordik Legal og fyrir hönd seljanda Kjartan Jónsson og Ólafur Steinarsson.

Líkar þetta

Fleiri fréttir