Nýverið tók gildi bann á Akrafjalli við lausagöngu hunda og gildir það út október. Rétt er því að benda öllum hundum á að vera ekki að þvælast einir á fjallinu og hvað þá í stórum hópum því það getur hrætt fólk og önnur dýr. Best er að taka með sér eigandann á fjallið og hafa hann í bandi en láta líta út fyrir að hann sé með ykkur í taumi. Ef þið hundarnir hittist þar er best að tala í hálfum hljóðum því eigendurnir gætu notað það sem þið segið gegn ykkur og jafnvel í slæmum tilgangi. Ef þið hittið kindur á fjallinu má alls ekki gelta á þær og ef þær eru að reyna að ná augnsambandi við ykkur er best að vera soldið kindarlegir á svipinn því það þola þær alls ekki. Þá væri gott ef þið gætuð laumað því að þeim að vera ekki að þvælast við bílastæðið og narta í bíla. Einnig láta þær í leiðinni skila því til vina sinna hestanna að gera það ekki heldur því þeir gætu átt það til að fá nagandi samviskubit yfir þessu öllu saman. Verum í bandi!

-vaks