Sigurður Ingi Sigurðsson í loftköstunum á Jiiibbiii. Ljósm. Dóri Bjöss.

Sindratorfæran á Hellu fór fram á laugardaginn

Sindratorfæran á Hellu fór fram á laugardaginn og hófu 18 keppendur keppni í tveimur flokkum. Keppnin var æsispennandi og var í beinni útsendingu á motorsport.is. Um 3000 manns fylgdust með streyminu í Skjáskoti sem sá um að koma öllu heim í stofu til þeirra sem fylgdust með. Strax í fyrstu braut voru það þeir Ólafur Bragi Jónsson á Refnum, Snorri Þór Árnason á Kórdrengnum og Skúli Kristjánsson á Simba sem tóku forystu í sérútbúna flokknum. Snorri leiddi framan af og sló meðal annars heimsmet í hraða á vatni þegar hann sigldi Kórdrengnum í 103 kílómetra hraða á ánni. Hann náði svo ekki að klára mýrina og þá skaust Ólafur Bragi á toppinn og Skúli fylgdi fast á eftir. Ólafur Bragi var vel að sigrinum kominn eftir frábæran akstur allan daginn með 1680 stig. Skúli, ríkjandi heimsmeistari, fylgdi fast á eftir með 1599 stig og Snorri Þór með 1550 stig. Í næstu sætum þar á eftir voru þeir Guðmundur Elíasson á Ótemjunni, Ásmundur Ingjaldsson á Bombunni og Sigurður Ingi Sigurðsson á Jiiibbiii. Ingvar Jóhannesson á Víkingnum hlaut tilþrifaverðlaun í þessum flokki eftir glæsileg tilþrif í þriðju braut þar sem hann snéri sér í nokkra hringi og endaði á hjólunum.

Mikil spenna í götubílaflokknum

Í götubílaflokknum var það Steingrímur Bjarnason á Strumpnum, ríkjandi Íslandsmeistari, sem byrjaði titilvörnina vel og nældi sér í flest stig eftir daginn. Hann kláraði ánna með miklum sóma og mýrina í fyrsta skipti á ævinni, sem væri ekki sögulegt nema fyrir það að vera búinn að keppa á Hellu á annan tug skipta. Það má því segja að hann hafi komið sá og sigrað, hreppti fyrsta sætið í sínum flokki, hlaut Helluna, farandbikar keppninnar, fyrir flest stig eftir daginn og tilþrifaverðlaun. Í öðru sæti varð Páll Pálsson en hann var að koma aftur eftir ellefu ára hlé. Hann skellti bensíni á Willys græjuna en átti aldrei möguleika á að ná Steingrími eftir að hann velti í 2. braut. Í þriðja sæti varð Haukur Birgisson á Þeytingi, hann lenti í slæmri veltu í annarri braut og datt því úr keppni en hreppti samt sem áður þriðja sætið því Óskar Jónsson lenti í slæmri bilun í fyrstu braut sem hann náði ekki að komast fyrir.

Þetta var í 45. skiptið sem Flugbjörgunarsveitin á Hellu stendur fyrir torfæru á Hellu og í fyrsta skipti sem áhorfendur geta einungis setið heima í stofu til þess að fylgjast með.

Það gekk ýmislegt á í vatninu.

Líkar þetta

Fleiri fréttir