Vegna þurrka um allt suðvestanvert landið síðan um miðjan apríl hefur nú verið ákveðið að lýsa yfir óvissustigi almannavarna. Hér er barist við gróðureld.

Óvissustigi almannavarna lýst yfir vegna þurrka

Ríkislögreglustjóri, í samráði við lögreglustjóra og slökkviliðsstjóra á Vesturlandi, höfuðborgarsvæðinu, Suðurnesjum og Suðurlandi, hafa ákveðið að lýsa yfir óvissustigi almannavarna vegna hættu á gróðureldum. „Svæðið sem um er að ræða nær frá Eyjafjöllum að sunnanverðu Snæfellsnesi. Þessi ákvörðun er byggð á því að lítið hefur rignt þessu svæði undanfarið og veðurspá næstu daga sýnir heldur ekki neina úrkomu af ráði,“ segir í tilkynningu.

Óvissustig almannavarna þýðir að aukið eftirlit er haft með atburðarás sem á síðari stigum gæti leitt til þess að heilsu og öryggi fólks, umhverfis eða byggðar verði ógnað. Að lýsa yfir óvissustigi er hluti af verkferlum í skipulagi almannavarna til að tryggja formleg samskipti og upplýsingagjöf á milli viðbragðsaðila og almennings. Almenningur er hvattur til að sýna aðgát með opin eld á þessum svæðum og öðrum þar sem gróður er þurr. Það þarf ekki mikinn neista til þess að af verði stórt bál. Ef fólk verður vart við gróðurelda á strax að hringja í 112.

Slökkviliðsmenn hér á Vesturlandi hafa nú verið beðnir að skrá sig á bakvaktir t.d. um helgar.

Líkar þetta

Fleiri fréttir