Bæjarstjórn Akraness samþykkti árið 2019 að innleiða verkefnið Heilsueflandi samfélag í samstarfi við embætti Landlæknis og Íþróttabandalag Akraness. Meginmarkmið Heilsueflandi samfélags er að styðja samfélagið á Akranesi við að skapa umhverfi og aðstæður sem stuðla að heilbrigðum lifnaðarháttum, heilsu og vellíðan allra íbúa. Markmið Heilsueflandi samfélags á Akranesi eru einnig að sveitarfélagið verði sjálfbærara, skilvirkara og eftirsóknarverðara til búsetu, t.d. með því að auka jöfnuð meðal íbúa þess.

Heilsueflandi samfélag á Akranesi stendur nú fyrir hreyfingarátaki Skagamanna sem kallast „Skagamenn umhverfis jörðina.“ Brottför í ferðina umhverfis jörðina verður 3. maí næstkomandi og heimkoma væntanleg 30. maí.

Teknar hafa verið saman gagnlegar upplýsingar fyrir þátttakendur:

Hversu langt er ferðalagið?

Já það er ekki nema 40.075,017 km.

Hvernig ferðast ég?

Þú reimar á þig góðan skóbúnað og klæðir þig eftir veðri og ferð út að ganga, hlaupa eða hjóla. Öll hreyfing utandyra telur!

Hvernig skrái ég hreyfinguna?

Þú skráir hreyfinguna inn á Strava. Þar er hópur sem heitir „Skagamenn umhverfis jörðina“. Stillir forritið á „run“ og leggur af stað. Saman söfnum við kílómetrum!

Hvert er markmiðið?

Það er að ganga frá Akranesi og umhverfis jörðina í því markmiðið að efla lýðheilsu skagamanna.

Taktu þátt í skemmtilegu ferðalagi og förum SAMAN umhverfis jörðina!