Frá því eldgos hófst á Reykjanesskaga föstudagskvöldið 19. mars síðastliðinn hafa landsmenn flykkst að gosstöðvunum til að berja sjónarspilið augum. Um er að ræða nokkuð merkilegt gos en kvikan sem streymir upp úr jörðinni kemur beint úr möttli jarðar, af meira dýpi en flest önnur eldgos í seinni tíð. En það er ekki hættulaust að fara að gosinu til að sjá það með eigin augum. Engin afmörkuð gönguleið var til staðar þegar gosið hófst, veður hefur verið bæði gott og slæmt þennan tíma sem gosið hefur staðið yfir og gas sem kemur upp á yfirborðið getur verið lúmskt og hættulegt. Það er því margt sem ber að varast. Til að fólk geti komist öruggt að gosinu hafa björgunarsveitir um land allt staðið þar vaktina, afmarkað gönguleiðir, fylgst með gasmengun og verið fólki innan handar sem meiðist, eða ræður illa við gönguna.

Rólegur dagur

Björgunarsveitarfólk á Vesturlandi hefur verið duglegt að leggja leið sína á Reykjanesið til að aðstoða við gæslu á svæðinu. Blaðamaður Skessuhorns fékk að fylgja fjórum meðlimum í Björgunarfélagi Akraness að gosinu síðastliðinn föstudag og fylgjast með störfum sveitarinnar á svæðinu. Við hittum þá Sigurð Axel Axelsson, Björn Torfa Axelsson, Ágúst Heimisson og Sölva Má Hjaltason í húsnæði sveitarinnar á Akranesi þar sem þeir voru að undirbúa brottför. Þeir gættu að því að allur nauðsynlegur búnaður væri með í för; GPS tæki, gasgrímur, hlý föt, sjúkratöskur og fleira. Að því loknu héldu þeir af stað með tvö sexhjól á kerru. Fyrsta stopp var í húsnæði Björgunarsveitarinnar Þorbjörns í Grindavík. Þar beið þeirra hlaðborð til að fylla á tankinn fyrir komandi vakt. Málin voru rædd við heimamenn og farið var yfir stöðuna við gosið þann daginn. Þetta hafði verið heldur rólegur dagur. Veður var frekar leiðinlegt og því fáir sem höfðu lagt leið sína að gosstöðvunum þennan dag.

Sjá ítarlega frásögn Önnu Rósu Guðmundsdóttur blaðamanns Skessuhorns í máli og myndum í blaði vikunnar.

Sölvi Már og Björn Torfi komnir í brekkuna þar sem fólk fylgdist með gosinu.

Ferð með Björgunarfélagi Akraness að eldgosinu á Reykjanesskaga