Vökvi úr riðusmituðum hræjum skvettist á þjóðveg í Borgarfirði

Í vikunni fór fram síðari hluti niðurskurðar á riðusmituðu fé á bænum Vatnshóli í Húnavatnssýslu. Í frétt Matvælastofnunar kemur fram að óhapp hafi orðið við flutning hræja úr fyrri niðurskurði á bænum þegar ekið var til brennslu í Kölku á Reykjanesi. „Matvælastofnun barst fyrr í þessari viku ábending um að vökvi hafi slest upp úr gámunum á þjóðvegi nr. 1 í Borgarfirði. Matvælastofnun kannaði málið og í kjölfarið fór stofnunin ásamt viðkomandi heilbrigðiseftirliti yfir verklag varðandi flutninginn. Í seinni flutningnum voru úrbætur gerðar til að koma í veg fyrir að slíkt óhapp endurtæki sig. Meðal annars fór flutningurinn fram strax að lokinni aflífun á fénu og minna magn sett í hvern gám,“ segir í tilkynningu frá MAST. „Smithætta af völdum þess vökva sem barst á þjóðveginn í síðustu viku er lítil að mati Matvælastofnunar, m.a. vegna árstíma og að ekkert fé er á beit auk þess sem þjóðvegur nr. 1 er afgirtur og gott eftirlit er með lausagöngu búfjár á svæðinu. Því er ekki ástæða til að grípa til sérstakra ráðstafana vegna atviksins. Umhverfisáhrif á borð við sólarljós, hita og kulda á víxl óvirkja smitefnið. Fólki stafar ekki hætta af riðusmitefni.“

Þá segir í frétt MAST að þegar upp kemur riða hafi Matvælastofnun að óbreyttu engan annan kost en að láta flytja allan sóttmengaðan úrgang um langan veg. Brennslustöðin Kalka, sem staðsett er á Suðurnesjum, er eina brennslustöðin á landinu sem hefur starfsleyfi til að taka á móti og brenna riðuhræjum.

Líkar þetta

Fleiri fréttir