Mælst til að leikskólabörn verði heima fram að páskum

Bæjarráð Akraneskaupstaðar samþykkti á fundi sínum síðastliðinn fimmtudag að vegna sóttvarnaraðgerða yfirvalda vegna Covid-19, mæltist bæjarfélagið til þess að þeir foreldrar leikskólabarna sem ættu þess nokkurn kost, héldu börnum sínum heima og kæmu ekki með þau í leikskólana meðan hertar samkomutakmarkanir gilda fram að páskum. „Foreldrum verða endurgreidd leikskólagjöld sbr. framangreint hafi viðkomandi tilkynnt leikskólanum um slíka ráðstöfun fyrirfram. Frístundastarf sveitarfélagsins fyrir börn á skólaaldri fellur niður meðan á samkomutakmörkunum stendur og þá gjöld fyrir sama tímabil,“ segir í bókun.

Greint er frá því í tilkynningu að bæjarstjóri Akraneskaupstaðar, ásamt öðrum öðrum bæjar- og sveitarstjórum á Vesturlandi, hafi í samskiptum við sóttvarnarlækni Vesturlands áréttað mikilvægi þess að forgangsröðun bólusetninga sé endurskoðuð í ljósi eðlisbreytingu á COVID-19 faraldrinum sem getur haft mun viðameiri áhrif á starfsemi leikskóla og skipað starfsfólki leikskólanna í hóp annars framlínufólks. „Sóttvarnarlæknir hefur tekið undir þessi sjónarmið og tekið málið áfram innan sóttvarnaryfirvalda/stjórnsýslunnar. Þessum áherslum hefur einnig verið komið á framfæri við Samband íslenskra sveitarfélaga,“ segir í tilkynningu Akraneskaupstaðar.

Líkar þetta

Fleiri fréttir