Kynning á nöfnunum, en börnin kusu að endingu um hvort nafnið yrði fyrir valinu. Ljósm. Ugluklettur.

Nýja deildin fær nafn eftir lýðræðislega kosningu barna í Uglukletti

Leikskólinn Ugluklettur í Borgarnesi hefur frá opnun árið 2007 verið þriggja deilda leikskóli. Nú hefur orðið breyting þar á og bættist fjórða deildin við núna í mars þegar ný deild var opnuð. Börnum hefur fjölgað jafnt og þétt í sveitarfélaginu frá haustinu 2020, það mikið að leikskólinn þurfti að setja börn á biðlista. Til þess að mæta þessari auknu þörf fyrir leikskólapláss var ákveðið að ráðast í að opna fjórðu deildina í Uglukletti. Við leikskólann hafa verið sett niður fjögur smáhýsi og fluttist aðstaða starfsfólks þar inn. Nýja deildin var opnuð 22. mars sl. þar sem starfsmannaaðstaðan var til húsa áður og var þannig hægt að bjóða öllum þeim börnum sem voru á biðlistanum leikskólapláss.

Þegar Ugluklettur opnaði 2007 var tekin sú stefna að nefna rými leikskólans eftir örnefnum í kringum leikskólann. Deildarnar sem fyrir voru heita Skessuhorn, Baula og Grábrók, allar eftir fjöllum í sveitarfélaginu svo ekki kom annað til greina en að nýja deildin fengi að heita eftir fjalli líka. Eftir heilmiklar vangaveltur og margar góðar hugmyndir stóðu starfsmenn skólans frammi fyrir því að velja á milli nafnanna Tungukollur og Eldborg.

Kjörseðill.

Þar sem starfsmönnum er mikið í mun að börnin fái tækifæri til að láta sína rödd heyrast og þau hafi með því eitthvað um nám sitt og líf að segja, vinnur skólinn mikið með lýðræði og nýtur sér barnasáttmála Sameinuðu þjóðanna í þeirri vinnu. Ákveðið var að nýta tækifærið og kynna börnunum hvernig lýðræðislegar kosningar virka og því var gengið til kosninga miðvikudaginn 17. mars um nöfnin Eldborg og Tungukoll. Börnunum voru sýndar myndir af fjöllunum og nöfnin þeirra rædd. Í upphafi var tekin umræða um hvað kosningar væru, hvernig þær færu fram, til hvers þær væru og mikilvægi þeirra. Á kjörskrá voru börnin á Grábrók, fædd 2015 og 2016, en þau eru 30. Á kjörstað mættu 26 kjósendur og tvö atkvæði bárust utan kjörfundar. Kosningin fór þannig fram að börnin fengu eitt í einu aðgang að kjörklefa og þar beið þeirra kjörseðill en á honum voru myndir af fjöllunum tveimur, nöfnin og reitur til að merkja í. Þegar þau höfðu nýtt kosningarétt sinn settu þau atkvæðið sitt í kjörkassa, sem var svo innsiglaður. Á fimmtudaginn var haldin kosningavaka þar sem atkvæðin voru talin og úrslit kosninganna kynnt. Þetta var vægast sagt gríðarlega spennandi þar sem atkvæðin skiptust frekar jafnt. En þau skiptust þannig: Tungukollur fékk 13 atkvæði og Eldborg 15 atkvæði. Nýja deildin í Uglukletti heitir því Eldborg.

Líkar þetta

Fleiri fréttir