Brákarhlíð. Ljósm. Ómar Örn Ragnarsson.

Tregðu gætir í kerfinu á fjölgun hjúkrunarrýma í Brákarhlíð

Stjórnendur hjúkrunar- og dvalarheimilisins Brákarhlíðar hafa sent heilbrigðisráðherra ítrekun á erindi sem þeir sendu 10. nóvember síðastliðinn. Í því var óskað eftir að þau fjögur biðrými sem Brákarhlíð var með samkvæmt sérstökum samningi vegna aðstæðna á LSH, yrðu samþykkt varanlega og hins vegar að fimm dvalarrýmum af sautján á heimilinu yrðu samþykkt sem hjúkrunarrými enda uppfylla þau allar þær kröfur sem til þeirra eru gerðar.

Ekki hafa borist nein viðbrögð við þessu erindi önnur en þau sem Birni Bjarka Þorsteinssyni framkvæmdastjóra heimilisins barst í tölvupósti 27. janúar síðastliðinn þar sem fulltrúi Sjúkratrygginga Íslands skrifaði: „Við erum loks að fá niðurstöðu varðandi framhaldið á þessum tímabundnu rýmum. Því miður er okkur frekar þröngt skorinn stakkur varðandi fjölgun rýma utan höfuðborgarsvæðisins en við getum boðið framlengingu á tveimur tímabundnum rýmum á Brákarhlíð út maí. Ráðuneytið telur mikilvægt að þessi rými yrðu notuð sem biðrými fyrir fólk af LSH til að létta af álagi þar…“ Þá segir: „Varðandi skipti á dvalarrýmum fyrir hjúkrunarrými er það möguleiki en þá í hlutfallinu tvö dvalarrými á móti einu hjúkrunarrými, en ekki eitt á móti einu eins og þið óskuðuð eftir. Ef það er eitthvað sem ykkur hugnast láttu mig þá endilega vita,“ skrifaði fulltrúi Sjúkratrygginga Íslands í svar sínu við erindi Brákarhlíðar.

Um þetta svar SÍ segja þeir Björn Bjarki og Jón G Guðbjörnsson formaður stjórnar m.a. í bréfi til ráðuneytisins: „Varðandi hjúkrunarrými vs. dvalarrými skal því svarað í fullri hógværð að okkur hugnast ekki skipti á íbúðarrýmum í anda ráðuneytisins eða SÍ. Við höfum ítrekað rökstutt afstöðu okkar í því efni með því að vísa til almenns skorts á hjúkrunarrýmum, viðvarandi biðlista í Brákarhlíð og þess að öll íbúðarrými í Brákarhlíð uppfylla skilyrði sem gerð eru til hjúkrunarrýma; þökk sé nýlegri uppbyggingu og endurbyggingu heimilisins. Einnig höfum við mótmælt viðmiði ráðuneytisins varðandi þörf fyrir hjúkrunarrými á starfssvæði HVE, að þar sé horft til meðaltalsþarfar svæðisins í heild, þrátt fyrir gjörólíkar aðstæður innan þess, enda er svæðið stórt og dreift um þrjá landshluta. Varðandi hinn þáttinn, sem við setjum framar í röð ef því er að skipta, þ.e. óskina um að þau fjögur biðrými sem við vorum með til síðustu áramóta verði gerð varanleg, þá uppskárum við tvö biðrými, framlengt til bráðabirgða til loka maí. Borið er við að SÍ sé frekar þröngt skorinn stakkur varðandi fjölgun rýma utan höfuðborgarsvæðisins.“

Loks segir í bréfi forsvarsmanna Brákarhlíðar: „Það væri gríðarlega dýrmætt í öllum rekstri Brákarhlíðar að til þessa væri horft nú, bæði hvað varðar þau tvö tímabundnu rými sem heimild fyrir til 31. maí nk. og að einnig verði horft til þess að heimilið getur útbúið tvö viðbótarrými með stuttum fyrirvara. Undirritaðir vænta enn skilnings og jákvæðra viðbragða við þessu endurtekna erindi og eru reiðubúnir til samtals og samvinnu um þætti þessa erindis við alla viðtakendur þess,“ skrifa þeir Jón G Guðbjörnsson formaður stjórnar og Björn Bjarki Þorsteinsson framkvæmdastjóri. Þingmönnum kjördæmisins og Sjúkratryggingum Íslands var sent afrit af bréfinu til ráðuneytisins.

Líkar þetta

Fleiri fréttir