Sjálfstæðismenn samþykktu prófkjörsleiðina

Kjördæmisráð Sjálfstæðisflokksins í Norðvesturkjördæmi samþykkti á streymisfundi laugardaginn 20. mars, með tveimur-þriðju greiddra atkvæða, að viðhafa prófkjör við uppröðun á framboðslista flokksins í kjördæminu. Kosið verður dagana 16. og 19. júní í sumar. Prófkjörið fer þannig fram að kjósendur merkja við fjóra frambjóðendur á listanum og verður farið eftir prófkjörsreglum Sjálfstæðisflokksins og þátttaka heimil öllum fullgildum meðlimum sjálfstæðisfélaganna í kjördæminu sem þar eru búsettir og þeim stuðningsmönnum Sjálfstæðisflokksins, sem eiga munu kosningarrétt í kjördæminu við kosningarnar og undirritað hafa inntökubeiðni í sjálfstæðisfélag í kjördæminu fyrir lok kjörfundar og teljast þar með komnir á flokksskrá.

Kjörnefnd mun á næstu dögum koma saman og ákveða framboðsfrest og annað í tengslum við prófkjörið. Á fundinum síðastliðinn laugardag lýstu núverandi þingmenn flokksins, Haraldur Benediktsson og Þórdís Kolbrún Reykfjörð Gylfadóttir, yfir framboði í fyrsta sæti en auk þeirra hefur Teitur Björn Einarssonar varaþingmaður gefið kost á sér í 2. sætið. „Fundurinn var vel sóttur, en á annað hundrað fulltrúar sátu fundinn sem fór fram á netinu. Sigríður Ólafsdóttir Víðidalstungu var kjörin formaður kjördæmisráðs. Auk hennar voru kjörin í stjórn: Gísli Gunnarsson Skagafirði, Maggý Hjördís Keransdóttir Patreksfirði, Carl Jóhann Gränz Akranesi, Daníel Jakobsson Ísafirði, Þorsteinn Pálsson Borgarfirði, Sigríður Finsen Grundarfirði og Regína Valdimarsdóttir Skagafirði,“ segir í tilkynningu frá skrifstofu Sjálfstæðisflokksins. Auk þess var á fundinum kosið í miðstjórn, flokksráð og í kjörnefnd vegna komandi kosninga til Alþingis.

Líkar þetta

Fleiri fréttir