Fjárrekstur. Ljósm. úr safni Skessuhorns og tengist fréttinni ekki með beinum hætti.

Óhapp við flutning hræja til brennslu

Síðastliðinn fimmtudag kom upp atvik við flutning á riðusmituðum úrgangi sem flytja átti til brennslu í Kölku á Suðurnesjum. Í tilkynningu frá Matvælastofnun segir að mikill þrýstingur af völdum gasmyndunar úr úrganginum hafi myndast í einum gámnum á meðan á flutningi stóð. Þetta hafi orðið til þess að hleri á ofanverðum gámnum gaf sig og uppgötvaðist atvikið áður en komið var að Hvalfjarðargöngum. Fram kemur að bílstjórinn stöðvaði tvisvar á leiðinni áður en atvikið átti sér stað til að kanna ástand gáma sem þá hafði reynst vera í lagi. Ekki var meira magn af hræjum í gámnum en tíðkast við flutning á riðusmituðum úrgangi.

„Atvikið var strax tilkynnt til Matvælastofnunar sem ákvað að stöðva flutning. Í kjölfarið var ástand gámanna kannað á gámaþjónustusvæði á Akranesi og hluta farmsins umhlaðið í annan gám áður en flutningur hófst að nýju. Við umhleðslu heltist niður blóð og annar vökvi úr farminum. Þrif og sótthreinsun svæðisins á Akranesi þar sem umhleðsla átti sér stað er lokið,“ segir í tilkynningu frá MAST: „Jarðvegsskipti munu fara fram í þeim tilgangi að fjarlægja smitefnið eins og kostur er. Svæðið verður í framhaldinu girt af í varúðarskyni til að fyrirbyggja smit í sauðfé.“

Líkar þetta

Fleiri fréttir