Guðjón hyggst hætta í stjórnmálum eftir kjörtímabilið

Guðjón S Brjánsson alþingismaður Samfylkingar í Norðvesturkjördæmi hyggst yfirgefa stjórnmálin að þessu kjörtímabili loknu. Í yfirlýsingu sem hann var að senda frá sér segir Guðjón: „Ég hef ákveðið að gefa ekki kost á mér í flokksvali Samfylkingarinnar í Norðvesturkjördæmi sem haldið verður seinna í mars. Stjórnmálin eru búin að eiga hug minn allan undanfarin ár og ég hafði stefnt á að gefa kost á mér næstu fjögur ár en hugur minn fylgdi ekki lengur hjarta þegar kom að ákvarðanatöku. Mig langar að eyða meiri tíma með minni fjölskyldu og fylgjast með barnabörnunum dafna og þroskast sem ég hef ekki haft nægilegan tíma til að gera,“ segir Guðjón.

„Ég hef setið á Alþingi Íslendinga frá alþingiskosningunum 2016 fyrir Samfylkinguna – Jafnaðarmannaflokk Íslands í Norðvesturkjördæmi. Á þeim tíma hef setið sem 1. varaforseti Alþingis og unnið í allsherjar- og menntamálanefnd, velferðarnefnd og umhverfis- og samgöngunefnd ásamt því að hafa verið formaður Íslandsdeildar Vestnorræna ráðsins. Ég er þakklátur fyrir þann heiður að hafa fengið að sitja á Alþingi fyrir hönd jafnaðarmanna og að hafa barist fyrir hagsmunum landsmanna allra á þingi. Ég þakka öllum mínum kjósendum í Norðvesturkjördæmi og samstarfsfélögum fyrir stuðninginn á liðnum árum,“ segir Guðjóns S Brjánsson.

Líkar þetta

Fleiri fréttir