Í ársbyrjun 2021 samþykkti Stjórn Menntaskóla Borgarfjarðar (MB) að skipa starfshóp sem móta á tillögur fyrir þróun skólans. Markmiðið er að auka sérstöðu og efla ímynd MB, koma til móts við nýjar þarfir í menntun ungs fólks, fjölga nemendum og laða að enn fjölbreyttari hóp nemenda, en auk þess að stuðla að jákvæðari búsetuskilyrðum í Borgarfirði. Signý Óskarsdóttir hjá Creatrix er verkefnastjóri hópsins en hann skipa einstaklingar úr atvinnulífinu og menntageiranum. Einnig var við myndun hópsins leitað til aðila úr háskólasamfélaginu og annarra sérfræðinga. „Mikilvægast er þó að heyra hvað unga fólkið hefur að segja um menntun fyrir störf framtíðar. Hvernig nám vill það og hvaða áherslur ættu að vera í skólastarfi að þeirra mati? Mikil áhersla er því lögð á að eiga samtal við ungt fólk, bæði núverandi, tilvonandi og útskrifaða nemendur skólans,“ segir Bragi Þór Svavarsson skólameistari.

„Menntaskóli Borgarfjarðar hefur löngum verið þekktur fyrir að vera sveigjanlegur og framsækinn skóli og heldur ótrauður áfram á þeirri braut. Í fyrravor skipulögðum við ráðstefnu sem bar heitið „Menntun fyrir störf framtíðarinnar.“ Efni hennar má ennþá nálgast á Youtube. Ráðstefnan endurspeglaði á margan hátt það sem fullrúar atvinnulífs á Íslandi og OECD telja vera mikilvæga hæfni fyrir framtíðina og hvaða áherslur ættu að vera í menntun ungs fólks í dag,“ segir Bragi Þór.

Starfshópurinn hittist á sínum fyrsta fundi í liðinni viku. Hópinn skipa Bjarki Þór Grönfeldt doktorsnemi, fulltrúi útskrifaðra nemenda, Bjarni Þór Traustason framhaldsskólakennari, fulltrúi starfsfólks MB, Helena Guttormsdóttir lektor hjá LbhÍ, fulltrúi stjórnar MB, Inga Dóra Halldórsdóttir framkvæmdastjóri Símenntunarmiðstöðvarinnar á Vesturlandi, fulltrúi stjórnar MB, Ingibjörg Ösp Stefánsdóttir forstöðumaður samkeppnishæfnisviðs SA, fulltrúi atvinnulífsins, Kolfinna Jóhannesdóttir sérfræðingur í framhaldsskólamálum, Ólöf Björk Sigurðardóttir framhaldsskólakennari, fulltrúi starfsfólks MB, Þorgeir Frímann Óðinsson, Directive games og formaður samtaka leikjaframleiðenda, fulltrúi atvinnulífsins og Ægir Már Þórisson, forstjóri Advania, fulltrúi atvinnulífsins.

Hér er slóð á ráðstefnuna Menntun fyrir störf framtíðarinnar.

Móta stefnu í MB um menntun fyrir störf framtíðarinnar