Tekjufallsstyrkir nálgast átta milljarða frá upphafi kóvid

Um miðja þessa viku höfðu 1.400 rekstraraðilar hér á landi fengið um 7,8 milljarða króna greidda í tekjufallsstyrki vegna heimsfaraldurs kórónuveiru. Tekjufallsstyrkir nýtast rekstraraðilum sem orðið hafa fyrir verulegu tekjufalli í heimsfaraldrinum og er markmið ríkisstjórnarinnar að viðhalda atvinnustigi og efnahagsumsvifum með því að styðja þau fyrirtæki og einyrkja þar sem tekjufall er meira en 40%.

Í tilkynningu frá fjármálaráðuneytinu kemur fram að alls hafa tugir milljarða verið greiddir í fjölbreyttan stuðning í úrræðum ríkisstjórnarinnar vegna faraldursins sem eru á annan tug talsins; styrkir, lán, gjaldfrestir og annað, sem á fjórða tug rekstraraðila og tugþúsundir einstaklinga hafa nýtt sér. „Sem dæmi hafa verið greiddir nærri tveir milljarðar króna í lokunarstyrki, sem koma til móts við rekstraraðila sem gert hefur verið að stöðva starfsemi sína, auk þess sem um 5,6 milljarðar króna hafa verið endurgreiddir aukalega af virðisaukaskatti vegna margs konar framkvæmda en endurgreiðslurnar nýtast einkum einstaklingum og félögum á borð við sveitarfélög, almannaheillafélög og íþróttafélög. Þá mun Skatturinn byrja að taka á móti umsóknum um viðspyrnustyrki á allra næstu dögum. Þeim styrkjum er ætlað að koma til móts við vanda rekstraraðila og gera samfélagið betur viðbúið því sem tekur við þegar heimurinn opnast að nýju,“ segir í tilkynningu frá fjármálaráðuneytinu.

Líkar þetta

Fleiri fréttir