Nýtt nám í áfallastjórnun við Háskólann á Bifröst

Þegar jörð skelfur reynir á. Reynslan kennir fólki að bregðast við slíkum aðstæðum en til þessa hefur ekki staðið til boða heildstætt nám í áfallastjórnun hér á landi. Næsta haust verður ráðin bót á því þar sem Háskólann á Bifröst mun ýta úr vör námi í áfallastjórnun. „Undirbúningur hefur staðið yfir í allan vetur og koma auk félagsvísindadeildar Háskólans á Bifröst að náminu almannavarnadeild ríkislögreglustjóra, Slysavarnafélagið Landsbjörg, Rauði krossinn á Íslandi, Samband íslenskra sveitarfélaga og Slökkvilið höfuðborgarsvæðisins. Það er afar dýrmætt fyrir skólann að geta boðið upp á þetta nám í samvinnu við helstu viðbragðsstofnanir samfélagsins,“ segir í tilkynningu frá skólanum.

Námið á Bifröst verður bæði hægt að taka til diplómu á meistarastigi og til fullrar meistaragráðu. Það er skipulagt þannig að nám til diplómu er 60 ECTS eininga fullt eins vetrar nám. Með því að bæta við 30 ECTS einingum með námskeiðum úr öllum deildum háskólans á Bifröst, félagsvísinda-, laga- og viðskiptadeild má ljúka MCM prófi í áfallastjórnun en með því að bæta við 30 ECTS ritgerð má ljúka MA prófi.

„Náttúruhamfarir eru samofnar sögu Íslands. Sé litið til síðastliðins aldarfjórðungs hafa stærstu áföllin í kjölfar náttúruhamfara verið vegna mannskæðra snjóflóða, jarðskjálfta, jökulhlaupa, eldgosa, aftakaveðurs og skriðufalla. Fyrir utan manntjón hafa þessi áföll haft gífurlegt fjárhagstjón í för með sér. Þá var áfallið sem þjóðarbúið varð fyrir við hrun bankanna haustið 2008 einnig alvarleg áminning um hversu á skortir að stjórnendur og stefnumótendur séu nægilega í stakk búnir til að axla ábyrgð á viðnámi og viðbrögðum vegna efnahagsáfalla. Áhrif kórónuveirufaraldursins á heilsu og efnahag sem og félagsleg áhrif eiga enn eftir að koma í ljós og krefjast aðgerða næstu árin.“

Þá segir í tilkynningu frá skólanum að með markvissari áfallastjórnun sé hægt að auka öryggi almennings og draga úr þeim skaða sem áföllum fylgja. „Þetta hefur hvatt fræðimenn til að þróa þekkingu og skilning á þeim ferlum og mannlegri hegðun sem hafa áhrif þegar áföll dynja á. Til þess hafa þeir leitað eftir samvinnu við viðbragðsaðila; þeirra sem reynsluna hafa. Áfallastjórnun er ung fræðigrein í örum vexti og hefur þegar skilað betri innsýn til þeirra stjórnenda og stefnumótenda sem með tileinkun á nýrri þekkingu og þjálfun hafa getað skilað markvissari áfallastjórnun.“

Hægt er að skrá sig í nám í áfallastjórnun við Háskólann á Bifröst gegnum vefsíðu skólans www.bifrost.is, en nánari upplýsingar veitir Njörður Sigurjónsson, deildarforseti félagsvísindadeildar.

Líkar þetta

Fleiri fréttir

Gleðilegt sumar!

Skessuhorn óskar lesendum sínum, ungum sem gömlum, til sjávar og sveita, gleðilegs sumars.