Meðfylgjandi mynd, sem birtist á vef Reykhólahrepps, tók Finnur Árnason um borð í Gretti þegar menn frá Vegagerðinni voru að stilla og ganga frá innsiglingarmerkjunum. Hér er Grettir í rennunni og ljósmerki sést í brúarglugganum.

Endurbætur til að auka öryggi við Reykhólahöfn

Nýverið var kveikt á nýjum stefnuvita á sjóvarnagarðinum við höfnina á Reykhólum. Stefnuvitinn er til leiðbeiningar um staðsetningu skipa í innsiglingarrennu að höfninni. „Hann virkar í stuttu máli þannig að þrjú ljós eru á vitanum; rautt, hvítt og grænt, ef eingöngu hvíta ljósið er sýnilegt, eru sjófarendur á réttum stað í rennunni. Einnig var sett hliðarmerki austan við enda innsiglingarrennunnar fjær höfninni, sem er grænn staur eða bauja með ljósmerki,“ segir í tilkynningu á vef Reykhólahrepps.

Á framkvæmdaáætlun siglingasviðs Vegagerðarinnar 2021 – 2024 er endurbygging og stækkun stálþilsbryggjunnar. Stækkunin er lenging á viðlegukanti til suðvesturs, þannig að bryggjan sem er eins og L í laginu verður T laga. „Bætir það umtalsvert aðstöðu fyrir stærri flutningaskip, en erfiðleikar hafa stundum verið með þau við bryggjuna, ekki síst í hvassviðri vegna þess að þau eru lengri en viðlegukanturinn. Stefnt er að því að bjóða verkið út á þessu ári og ættu framkvæmdir að geta hafist í upphafi næsta árs.“

Líkar þetta

Fleiri fréttir