Í dag var byrjað að rífa ÞÞÞ húsið við Dalbraut 6 þar sem Leigufélag aldraðra mun byggja fjölbýlishús. Ljósmyndir: Skessuhorn/mm

Gamla ÞÞÞ húsið hverfur brátt af stalli sínum

Í dag var byrjað að rífa ÞÞÞ hússins við Dalbraut 6 á Akranesi. Þakið er farið og einungis útveggir standa eftir. Akraneskaupstaður keypti húsið árið 2014 af Bifreiðastöð Þórðar Þ Þórðarsonar sem byggði í framhaldi sölunnar yfir starfsemi sína með myndarlegum hætti við Smiðjuvelli 15. Með í þeirri sölu var 12.000 fermetra samliggjandi lóð, sem í dag nefnist Dalbrautarreitur. Á reitnum byggir fyrirtækið Bestla ehf. þrjú fjölbýlishús. Lokið er við eitt þeirra og íbúar fluttir inn. Í því húsi verður jafnframt samkomusalur og ýmis þjónusta fyrir eldri borgara á Akranesi. Hafnar eru framkvæmdir við hús númer tvö og er áætlað að uppsteypu þess verði lokið í ágústmánuði. Þegar það hús verður tilbúið mun Bestla hefjast handa við þriðja og síðasta húsið sem fyrirtækið byggir á reitnum a.m.k. í bili.

Það er Leigufélag aldraðra sem er með í gangi niðurrif ÞÞÞ hússins við Dalbraut 6 og byrjar í framhaldinu framkvæmdir við fjórða húsið á þessum hluta Dalbrautarreits. Á annað hundrað íbúðir verða í þessum fjórum húsum þegar yfir lýkur.

ÞÞÞ húsið við Dalbraut 6 meðan fyrirtækið var enn með starfsemi sína þar. Ljósm. úr safni Skessuhorns.

Bestla er byrjað uppsteypu fjölbýlishúss sem rís við Þjóðbraut 3. Til hægri er Dalbraut 4 en til vinstri Þjóðbraut 1.

Líkar þetta

Fleiri fréttir