Nú hefur hafið göngu sína hlaðvarp á vegum Samtaka sveitarfélaga á Vesturlandi sem ber heitið „Vesturland í sókn“. Hlaðvarpið er framtak starfsmanna SSV og hefur þann tilgang að fræða fólk um störf SSV og verkefnin sem eru í brennidepli hverju sinni. Þá er stefnt að því að kynnast nánar þeirri atvinnuþróun og menningarstarfsemi sem á sér stað á Vesturlandi og ná tali af fólki sem getur frætt hlustendur um þróun landshlutans frá ólíkum áttum, hvort sem það á við um gamla tíma, núið eða framtíðina. „Hlaðvarpið speglar þannig samfélagið á Vesturlandi frá ólíkum áttum,“ segir í kynningu.

Hlaðvarpið má nálgast á öllum hlaðvarpsveitum, hvort sem er í símaforritum eða á netinu og einnig er spilari á heimasíðu SSV. Þáttastjórnendur eru Vífill Karlsson hagfræðingur, Sigursteinn Sigurðsson velferðar- og menningarfulltrúi og Thelma Harðardóttir verkefnastjóri þróunarverkefna. Nú þegar má finna þrjú hlaðvörp á rásinni. Í fyrsta lagi kynng á hvað SSV er, þá kryfja Páll S Brynjarsson og Vífill Karlsson íbúakönnun 2020 og loks er rætt við Sigurstein Sigurðsson menningarfulltrúa um verkefni sem efst eru á baugi á hans verksviði.

Sjá nánar hér